Hansı qüvvələrin birləşməli olduğunu repressiyalar müəyyən edib

İctimai Palata (İP) çərşənbə axşamı Müsavat Partiyasının qərargahında son zamanlar kütləviləşən repressiyalarla bağlı dinləmələr keçirib.

İP-nın İnsan Hüquqlarını Müdafiə Komitəsinə isnadən 2013-cü ilin 3 ayı ərzində demokratik düşərgədən 37 nəfərin həbsə alındığı qeyd olunub. Bu həbslər iqtidarın seçkiyə “özünəməxsus şəkildə hazırlaşması” kimi dəyərləndirilib. “Əsgər ölümlərinə son” aksiyalarında fəal iştirakına görə gənclərin kütləvi həbsinin başladığı nəzərə çatdırılıb. Repressiylar fonunda tanınmış siyasətçi İbrahim İbrahimlinin Naxçıvanda zorakılığa məruz qoyulması “əxlaqdan uzaq” addım sayılıb. “İqtidar rəqiblərinə belə təzyiq, təqib, həbslər mühitində seçkiyə hazırlaşır”, deyə V.Mirkamal iqtidarın ədalətli seçki keçirməyəcəyinə işarə edib.

AXCP sədri Əli Kərimli artıq iqtidarın təkcə müxalifətlə yox, bütün cəmiyyətlə qarşıdurmada olduğunu nəzərə çatdırıb. İqtidarın cəmiyyətdə haqqını tələb edən istənilən insanı özünə rəqib saydığı vurğulanıb. Hərbi ekspert Yaşar Cəfərlinin, siyasətçi İ.İbrahimlinin fiziki zorakılığa məruz qoyulması iqtidarın zorakılığı açıq müstəviyə gətirməsi hesab edilib. İqtidarın fəal vətəndaşlara və “facebook”a savaş açdığı vurğulanıb. Qeyd edilib ki, ölkənin vətəndaşları korrupsiyaya, oğurluğa, talançılığa, özbaşınalığa etiraz edir. Bu neqativlər qaldıqca mübarizənin davam etdiriləcəyi nəzərə çatdırılıb. “Narazılıq artdıqca, həbslərə, təqib və təzyiqlərə baxmayaraq, narazıların sayı da artacaq”, - deyə Ə.Kərimli iqtidara həbslərin gözlənilən nəticəni verməyəcəyi xəbərdarlığı edib.    

Hüquqşünas Vidadi İsgəndərli Azərbaycan iqtidarını “cinayətkar birlik” adlandırıb. Rəsmi Bakının fəal vətəndaşları artıq ailə-uşaqları ilə hədlədyinə diqqət çəkib. 

Vəkil Qurban Məmmədov xalqın mübarizəyə qoşulmamasının təqsirkarı kimi AXC və Müsavat partiyalarının birləşməməsini göstərib. Bu iki partiya birləşdiyi halda xalqın ayağa qalxacağı ifadə edilib. Hakimiyyət dəyişiklikliyi olduğu halda şəxsiyyət əleyhinə cinayət edənlər istisna olmaqla, müxalifətin qalan iqtidar mənsublarına mal və canlarının təhlükədə olmayacağı zəmanəti verilməsi təklif edilib. 

Müxalifətin birlik məsələsilə bağlı Müsavat lideri İsa Qəmbər demokraik seçki, kütləvi aksiyalar keçirilməsi məsələsində müxalif qüvvələrlə funksoinal əməkdaşlığa dair sənədlər imzalandığını deyib. Bununla yanaşı, bütün qüvvələrin yox, “birləşməli olan qüvvələrin birləşməsi” məsələsini gündəmə gətirib. İ.Qəmbər siyasi fəallığına görə Müsavat, Xalq Cəbhəsi partiyalarının, Ziyalılar Forumunun, “EL”, “REAL” Hərəkatlarının, gənclər qurumlarının və dindarların iqitidarın təzyiqlərinə məruz qaldığını söyləyib. “İqtidar repressiyaları ilə birləşməli olan qüvvələrin sərhədlərini özü çəkib”, - deyə İ.Qəmbər hansı qüvvələrin birləşməli olması sualına aydınlıq gətirib. -05C-