Həbs edilmiş AXP fəalı xəstəxanaya yerləşdirilib

Həbsdə olan AXCP gənc fəalı Daşqın Məlikov Ədliyyə Nazirliyinin Müalicə Müəssisəsinə köçürülüb. Bu barədə onun atası Əlisəfa Məlikov bildirib.

Onun sözlərinə görə, Şüvəlan istintaq təcridxanasından doğmalarına zəng edərək, Daşqının vəziyyəti pisləşdiyi üçün xəstəxanaya yerləşdirildiyini bildiriblər.

D.Məlikovun vəkili xaricdə ezamiyyətdədir və doğmaları ətraflı məlumat ala bilmirlər.

D.Məlikov bronxial astmadan əziyyət çəkir, bununla belə, iyulun 3-də Sumqayıt şəhər məhkəməsi onu narkotik saxlamaq ittihamı ilə 2,5 il müddətinə azadlıqdan məhrum edib. O, martın 25-də həbs edilib və istintaq təcridxanasında saxlanıldığı müddət ərzində vəziyyəti getdikcə pisləşib.

Fəalın həbsinin əsl səbəbi bloger kimi fəallığı olub. O, sosial şəbəkələrdə gənclərin mitinqlərinə dəstək üçün fəal iş aparan və gəncləri bu aksiyalarda iştiraka çağıranlardan biri olub. -06D-