Həmkarlar ittifaqı fəalı polisi ona fiziki təzyiq göstərməkdə ittiham edib

Bu gün Bakı Ağır Cinayətlər Məhkəməsində həmkarlar ittifaqı fəalı Ayxan İsrafilovun işi üzrə proses davam edib. O, narkotik maddə işində ittiham olunur.

İclas zamanı Nərimanov Rayon Polis İdarəsinin iki əməkdaşı şahid qismində dindirilib. Onlardan biri Vüsal Həsənov ifadə verib ki, İsrafilovda narkotik maddə olması barədə məlumatla əlaqədar onun yaşadığı ünvana gedib.

Lakin İsrafilov məhkəmədə bildirib ki, Həsənov onun evinə gəlməyib və onlar polisdə qarşılaşıblar. Məhz Həsənov ona fiziki təzyiq göstərərək etirafedici ifadə verməyi tələb edib.

Vəkil Fariz Namazlı polisdən soruşub ki, İsrafilov narkotik maddə ilə əlaqədar saxlanılarkən niyə onun motosikletinə baxış olmayıb. Polis cavab verib ki, onun məlumatına görə, narkotik maddələr İsrafilovun özündə olub.

Dindirilən digər polis Fariz Nağıyev İsrafilovla eyni məktəbdə oxuyub. Polis İsrafilova məsləhət görüb ki, onda narkotik maddə tapıldığını etiraf etsin və kiçik dozanın “sənədləşdiriləcəyini” və cəmi 3 il həbs cəzası  vəd edib.

İsrafilov deyib ki, ona fiziki təsir göstərilərkən və narkotik maddənin "tapılmasına" dair videoçəkiliş zamanı təyinatı üzrə vəkil orada olub, lakin heç bir şəkildə müdaxilə etməyib.

Müdafiə tərəfi təyin olunmuş vəkilin 11 və 12 avqust tarixlərində Nərimanov polisinə və müvəqqəti saxlanma təcridxanasına getdiyini yoxlamaq üçün həmin yerlərdəki videomüşahidə kameralarından qeydlərin tələbilə vəsatət qaldırıb.

Bu vəsatət ona görə qaldırılıb ki, vəkil İsrafilovun yanında ancaq bir dəfə qısa müddətdə olub.

Növbəti məhkəmə iclası fevralın 27-nə təyin edilib.

* İşçi Masası Həmkarlar İttifaqları Konfederasiyası İdarə Heyətinin üzvü Ayxan İsrafilov 2023-cü ilin avqustunda həbs edilib. O, Cinayət Məcəlləsinin 234.1-1-ci (narkotik maddələrin saxlanması və yayılması) maddəsilə ittiham olunub. Onu 3 ildən 8 ilədək həbs təhlükəsi gözləyir.

Ayxan İsrafilov ittihamı qəti şəkildə rədd edir və öz həbsini ictimai fəaliyyətilə əlaqələndirir ki, bu da özünü kuryer xidməti işçilərinin hüquqlarının qorunmasında göstərib.