Hərbi prokuror Gəncə hadisələrinə qiymət verir

Bakı/26.07.18/Turan: Hərbi prokuror Xanlar Vəliyev Gəncə hadisələrini "qanlı terror" adlandırıb. İyulun 3-də onun qardaşı - Gəncə şəhərinin icra başçısı Elmar Vəliyev və onun cangüdəni Qasım Aşbazova atəş açılıb. İyulun 10-da isə iki polis zabiti öldürülüb.

İyulun 26-da Hərbi Prokurorluqda keçirilən əməliyyat müşavirəsindəkı çıxışında X.Vəliyev bu hadisələri radikal müxalifət və dini-ekstremist təşkilatlarla xarici dövlətlərin xüsusi xidmət orqanlarının törətdiyini bildirib. Onun sözlərinə görə, onlar ölkədəki sabitliyi pozmaq istəyiblər.

O, xaricdə yaşayan və Azərbaycana düşmən münasibət bəsləyən azərbaycanlıların bu hadisələrdə əli olduğunu bildirib. Bu cinayətlərdə məqsəd ölkədə hakimiyyətin zorla ələ keçirilməsi, Azərbaycanın Konstitusiya quruluşunun zorla dəyişdirilməsi və ya ərazi bütövlüyünün parçalanmasıdır.

Sonra o, cinayətkarlıqla mübarizə haqda məlumatverib. Onun sözlərinə görə, son yarım ildə qeydə alınmış cinayətlərin 99.3 faizi açılıb. Bu ilin birinci yarısında ağır cinayətlər 3.6, xüsusilə ağır cinayətlər 14.3, qeyri-hərbi cinayətlər 19, fərarilik cinayətləri isə 50 faiz azalıb. Birinci yarımildə korrupsiya və rüşvətxorluq halları üzrə 70 şəxsin barəsində 57 cinayət işinin istintaqı tamamlanıb. -16D06-