Həsən Ruhaninin Bakı səfərinin ilk gününün yekunları

Noyabrın 12-də İran prezidenti Həsən Ruhaninin Azərbaycana səfəri çərçivəsində ikitərəfli sənədlər imzalanıb.

Bundan öncə prezidentlər İlham Əliyevlə Həsən Ruhaninin təkbətək, eləcə də nümayəndə heyətlərinin iştirakı ilə görüşləri olub.

Yekunda alternativ və bərpa olunan enerji mənbələri sahəsində əməkdaşlıq və qarşılıqlı anlaşma; iqtisadi və texniki əməkdaşlıq haqqında, yüksək texnologiyalar və poçt sahəsində əməkdaşlıq; sərhəd çaylarının nizamlanması və sahillərin mühafizəsi haqda  memorandumlar imzalanıb.

Danışıqlardan sonra brifinqdə çıxış edən İ.Əliyev deyib ki, imzalanan sənədlər, fikir mübadilələri və noyabrın 13-də keçiriləcək biznes forum ikitərəfli əlaqələri möhkəmləndirəcək.

“İranla Azərbaycan arasında güzəl siyasi əlaqələr var. Mütəmadi təmaslarımız, yüksək vəzifəli şəxslərin qarşılıqlı səfərləri, beynəlxalq təşkilatlarda bir-birimizə göstərilən dəstək siyasi əlaqələrimizin yüksək səviyyədə olmasını əyani şəkildə sübut edir”, - dövlət başçısı vurğulayıb.

“Azərbaycan üçün ən vacib problem olan Ermənistan-Azərbaycan, Dağlıq Qarabağ münaqişəsinin həllində də biz İranın dəstəyini həmişə hiss edirik. İranın mövqeyi beynəlxalq hüquqa və ədalətə söykənir”, - İ.Əliyev qeyd edib.
  İqtisadiyyata toxunan dövlət başçısı deyib ki, energetika sahəsində əməkdaşlıq müzakirə olunub: “Neft-qaz, elektrik enerjisi, qaz mübadiləsi sahələrində çox böyük imkanlar var. Artıq bir neçə layihə icra edilib. Yeni layihələrin icra edilməsi də gözlənilir”. 

“Şimal-Cənub nəqliyyat dəhlizinin yaradılması hər iki tərəfin marağındadır. Biz bu önəmli layihənin həyata keçirilməsində fəal iştirak edirik, öz səylərimizi qoyuruq. Şimal-Cənub nəqliyyat dəhlizi nəinki İran və Azərbaycan, bütün bölgə üçün önəmlidir”, - o bildirib. 
  O həmçinin Xəzər sammitinin yekunlarını qeyd edib: “Həştərxan şəhərində keçirilmiş Xəzər zirvəsi də çox uğurlu zirvədir, gözəl nəticələr olub, vacib qərarlar qəbul edilib”.

Həsən Ruhani cavab nitqində bildirib ki, bu iki ölkə, bu iki xalq birdir, həm məzhəbi, həm dini birdir, müştərək tarixə, keçmiş tarixə malikdirlər və bir-birinin mədəniyyətinə bələddirlər, bir-birini çox yaxşı başa düşürlər.
  “Biz Qəzvin-Rəşt və Rəşt-Astara dəmir yolunun tikintisinə və birləşməsinə nail olaq. Biz bu dəhliz vasitəsilə Qara dənizə və Avropaya, Rusiyaya çıxaq, onların dəmir yolu sisteminə birləşək”, - o qeyd edib.

İran prezidenti Xəzərdə əməkdaşlığın inkişafına, viza rejiminin sadələşdirilməsinə tərəfdar olduğunu bildirib.

Qarabağ problemindən danışan Ruhani deyib: “Biz bilirik ki, Qarabağ məsələsi siyasi yolla həll olunmalıdır. Bu, müharibə yolu ilə həll olunası məsələ deyil. Ona görə də bu istiqamətdə bütün köməyimizi göstərməyi öz vəzifəmiz hesab edirik və bunu etməyə hazırıq”.

Regionda vəziyyətə toxunan İran prezidenti başqa ölkələrin regiona müdaxiləsinin yolverilməz olduğunu bildirib.

“Biz iki prezident təkbətək görüşdə bir-birimizə bildirdik ki, heç bir kənar qüvvələrin bizim əlaqələrimizə ixtilaf salmasına və heç bir qruplaşmanın, heç bir partiyanın, heç bir ittifaqın əlaqələrimizin inkişafına xələl gətirməsinə imkan verməyək. 

“Azərbaycan uranın sülh məqsədləri üçün zənginləşdirilməsində, nüvə məsələsində İrana dəstək verib. Biz bununla əlaqədar təşəkkürümüzü bildiririk”, - H.Ruhani vurğulayıb. 02D-