Hikmət Hacıyev ABŞ rəsmi şəxslərilə Qarabağ, Ukrayna və energetika məsələlərini müzakirə edib

Vaşinqton/07.06.22/Turan: Bazar ertəsi ABŞ-ın yüksək vəzifəli rəsmi şəxsləri Azərbaycan prezidentinin xarici siyasət məsələləri üzrə müşaviri Hikmət Hacıyevə Bakı və Yerevan arasında birbaşa əlaqələrdə maraqlı olduqlarını bildiriblər, Turan-ın Amerika müxbiri bildirib.

Hacıyev Dövlət Departamentində dövlət katibinin köməkçisi Karen Donfrid və Ağ Evdə prezident Baydenin milli təhlükəsizlik üzrə müşaviri Ceyk Sallivan ilə bağlı qapılar arxasında görüşüb.

Bu, dövlət katibi Entoni Blinkenin Ermənistanın baş naziri Nikol Paşinyanla telefon danışığı zamanı sərhəd məsələlərinin həllinə kömək təklif etməsindən bir neçə həftə sonraya təsadüf edir.

Bazar ertəsi brifinqdə Dövlət Departamentinin nümayəndəsi Ned Prays Vaşinqtonun praktik olaraq necə kömək edə biləcəyilə bağlı Turan-ın  sualının cavabında deyib: “Söhbət sərhədlərin demarkasiyasında Ermənistan və Azərbaycana kömək etməkdən gedir”. O, detalları açıqlamayıb.

Öz növbəsində Milli Təhlükəsizlik Şurası bildirib ki, Ceyk Sallivan Hacıyevlə görüş zamanı deyib ki, “ABŞ Azərbaycan və Ermənistanın davamlı sülhün əldə edilməsinə yönələn tarixi diplomatik səylərini yüksək qiymətləndirir”.

Sallivan həmçinin Avropa İttifaqı Şurasının prezidenti Şarl Mişelin təşkil etdiyi danışıqlara dəstəyini ifadə edib.

“O, ABŞ-ın sıx qarşılıqlı fəaliyyət göstərməyə və  müxtəlif yollarla, o cümlədən Avropada Təhlükəsizlik və Əməkdaşlıq Təşkilatının (ATƏT) Minsk Qrupunun həmsədri kimi  tərəqqiyə dəstək verməyə hazır olduğunu bildirib”, - məlumatda deyilir.

“Görüş zamanı Sallivan və Hacıyev “həmçinin Rusiyanın əsassız təcavüzünə cavab olaraq Ukrayna xalqına yardıma sadiq olduqlarını müzakirə ediblər. Sallivan Azərbaycanı Avropanın enerji təhlükəsizliyinə sadiqliyinə görə alqışlayıb və regional enerji resurslarının tədarükünün daha da şaxələndirilməsi səylərini müzakirə edib. Onlar həmçinin Ukraynadakı münaqişənin bütün region üçün fəsadları barədə fikirlərini bölüşüblər”, - məlumatda deyilir. -25B-