Hökumətyönlü KİV Azərbaycan Silahlı Qüvvələrinin irəlilədiyini bildirib

Bakı/03.04.23/Turan: Azərbaycan Silahlı Qüvvələri əvvəl tutduğu mövqelərdən irəliləyərək Şuşa rayonunda iki kəndi – Allahqulular və Zamanpəyəsini tutub. Bu barədə aprelin 3-də ölkənin hökumətyönlü və rəsmi KİV-ləri məlumat yayıblar.

Müdafiə Nazirliyinin saytında belə məlumat yoxdur. Bu məlumatları Müdafiə Nazirliyinin mətbuat xidmətində təsdiqləmək cəhdləri nəticə verməyib.

Qeyd edək ki, azərbaycanlı  əhalinin yaşadığı bu iki kiçik kənd hələ 1992-ci ildə Birinci Qarabağ Müharibəsi zamanı erməni qoşunlar tərəfindən işğal edilərək yandırılmışdı. Son vaxtlara qədər bu ərazi ermənilərin nəzarəti altında idi.

Şuşadakı postdan yan keçərək Ermənistanla əlaqə saxlamaq üçün erməni tərəfin istifadə etdiyi torpaq yol bu kəndlərdən keçir.

Martın 25-də Azərbaycan Silahlı Qüvvələri Sarıbaba dağı tərəfdən irəliləyərək  2054 metrlik yüksəkliyi (2,9 kilometr şimal-şərqdə) tutub və post qurub. Bu yerdə üç torpaq yol birləşir ki, Şuşadan yan keçərək Laçın yoluna çıxmaq mümkün idi.

Beləliklə, erməni tərəfin Azərbaycanın nəzarətindən yan keçməklə Ermənistanla əlaqə yaratmaq imkanını əngəlləmək mümkün olub.

Hazırda Azərbaycan Silahlı Qüvvələri bir o qədər irəliləyərək Zamanpəyəsi kəndindən Laçın trasına qədər daha bir torpaq yolu tutub. Bununla da Azərbaycan Silahlı Qüvvələrinin postlarından yan  keçərək Xankəndidən Laçın yoluna daha bir çıxış yolu bağlanıb. 02B