Human Rights Watch: Narkotik Azərbaycan hakimiyyətinin sevimli metodudur

Azərbaycan hakimiyyəti iki gənc fəalın təqibi üçün uydurma narkotik saxlama ittihamlarından istifadə edir, deyə Human Rights Watch-un bəyanatında qeyd edilir.

İttihamlar, görünür, Bakıdakı abidədə qraffitiyə cavab olub. Hakimiyyət onları dərhal azad etməli və polis bölməsində fəallara qarşı amansız rəftar haqqında məlumatları araşdırmalıdır.

22 yaşlı Qiyas İbrahimov və 21 yaşlı Bayram Məmmədov 2016-cı il mayın 10-da saxlanılıblar, mayın 12-də Xətai rayon məhkəməsi onları 4 ay müddətinə azadlıqdan məhrum edib.

Məhkəmədə gənclər polis bölməsində onlarla amansız rəftar olunduğunu bildiriblər.

“Azərbaycanın gənc fəalları qorxutmaq üçün onlara qarşı uydurma narkotik saxlama ittihamları irəli sürmək təcrübəsi var”, deyə Human Rights Watch-un Cənubi Qafqaz üzrə proqram direktoru Georgiy Qogiya bildirib.

“İbrahimovun və Məmmədovun işi hakimiyyətin fərqli düşüncəni boğmaq məqsədilə tətbiq etdiyi bu taktikanın son nümunəsidir”, deyə o bildirib.

Son üç ildə Azərbaycan hökuməti onlarla siyasi fəalı, hüquq müdafiəçisini, jurnalisti və hökumətin digər tənqidçilərini həbsə atıb.

İbrahimov sosial şəbəkələrdə fəal olan gənclərin müxalif NİDA hərəkatının üzvüdür.

Məmmədov digər solçu gənclər qrupu olan Solfront-un üzvüdür. Hər ikisi Bakı Slavyan Universitetinin tələbələridir.

Mayın 10-da səhər saatlarında onlar Azərbaycanın keçmiş prezidenti, prezident İlham Əliyevin atası Heydər Əliyevin abidəsinin postamentinə yazı yazıblar.

Vəkil Elçin Sadıqov HRW-yə bildirib ki, Nərimanov rayon polis bölməsində saxlanılan gənclərlə görüşməyə müvəffəq olub. İbrahimov və Məmmədov ona deyiblər ki, polis onlardan azad edilmək istəyirlərsə, abidə önündə hamının qarşısında üzr istəməsini tələb edib.

Onlar bundan imtina etdikdə isə polis onları döyüb, narkotik saxladıqlarını etiraf etməsələr onları zorlamaqla hədələyib. Göstərilmiş təzyiqdən sonra vəkil yanlarına buraxılmamışdan əvvəl onlar qanunsuz narkotik saxladıqlarını etiraf ediblər.

Vəkil həmçinin polisin gəncləri təpiklə vuraraq, polis bölməsinin tualetlərini və həyətini təmizləməyə məcbur etdiyini görüb. Vəkilin etirazından sonra o, bölmədən qovulub.

Vəkil İbrahimovun və Məmmədovun üzündə qançırlar və qan görüb.

Azərbaycan hakimiyyəti İbrahimovun və Məmmədovun Avropa İnsan Hüquqları Konvensiyasında zəmanət verilmiş vəkillə təmin edilmək hüququnu pozub.

Bundan başqa, azadlıqdan məhrumetmə yerlərində amansız rəftar həm yerli, həm də beynəlxalq hüquqla qadağan edilir.

Hakimiyyət İbrahimovu və Məmmədovu böyük miqdarda narkotik maddəni satmaq məqsədilə qanunsuz əldə etməkdə və saxlamaqda (CM-in 234.4.1 və 234.4.3-cü maddələri) ittiham ediblər.

Vəkil qeyd edib ki, polis Məmmədovun ailə üzvlərinin axtarışda iştirak etməsinə icazə verməyib.

Daha sonra polis Məmmədovun və İbrahimovun hər birinin evində bir kq heroin tapdığını bildirib. İbrahimov və Məmmədov məhkəmədə polis bölməsində döyüldüklərini və hədələrə məruz qaldıqlarını bildiriblər.

“Hakimiyyət İbrahimova və Məmmədova qarşı narkotik ittihamını dərhal ləğv etməli və qraffitiyə görə onları cəzalandırmaq istəyirsə, bunu inzibati xətalar məcəlləsinin maddələrinə uyğun şəkildə etməlidir.

Bu, siyasi səbəblərlə cinayət ittihamlarının saxtalaşdırılması hadisəsidir”, deyə Qogiya bildirib. -02D-