Hüquq müdafiəçiləri Azərbaycanın Trampın otelində Hanuka bayramını keçirməsinə etiraz ediblər

Amerikanın hüquq-müdafiə təşkilatlarının bir qrup nümayəndəsi dekabrın 14-də Vaşinqtonda Azərbaycan səfirliyinin yəhudilərin Hanuka bayramını təşkil etməsinə  etiraz olaraq aksiya keçirib.

Freedom Now təşkilatının nümayəndəsi Cared Genser bildirib ki, bu qurum vicdan məhbuslarının azad edilməsi məqsədilə fəaliyyət göstərir və yəhudi təşkilatların rəhbərlərini Azərbaycandan siyasi məhbusların azad olunmasını tələb etməyə çağırıb.

“Azərbaycan çoxdandır ki, özünü dünyəvi müsəlman dövləti, İsrailin və Qərbin müttəfiqi kimi təqdim etməyə çalışır. Bununla belə, din azadlığına Əliyev hökuməti tərəfindən sərt nəzarət olunur. Etiraz edən fəallar çox zaman həbs edilir və saxta ittihamlarla mühakimə olunur”, - Genser vurğulayıb.

O deyib ki, Hanuka yəhudilər üçün din azadlığı və müxtəliflik bayramıdır. Eyni zamanda Azərbaycan hökuməti üçün ölkədəki korrupsiya sistemindən və insan haqlarının pozulmasından diqqəti yayındırmaqdan ötrü  özünü stabil Qərb demokratiyasına sadiq ölkə kimi təqdim etmək cəhdidir.

“Azərbaycan hökumətinin onu tənqid edənləri və əleyhdarlarını dəfələrlə həbsə aldığı azmış kimi, son bir neçə ayda repressiya maşınını gücləndirib, fikir və din azadlığını sərtləşdirib”, - o bilıdiorib.

Aksiyanın digər iştirakçısı, ABŞ beynəlxalq din azadlığı komissiyasının baş analitiki  Ketrin Kosman diqqəti ona yönəldib ki, Azərbaycanda siyasi məhbusların yarıdan çoxu din xadimləridir.

“2015-ci ilin Nardaran hadisələri üzrə mühakimə olunanların çoxu polisdə dəhşətli işgəncələtə məruz qalıb. Bu, hakimiyyətin ölkədə din azadlığının olmasını bəyan etməsilə ziddiyyət təşkil edir”, - o vurğulayıb.-25В-