Hüquq müdafiəçisi Elçin Behbudov həbsdə olan gənclərə baş çəkib

Yanvarın 6-da Azərbaycan İşgəncələr Əleyhinə Komitəsinin rəhbəri Elçin Behbudov  inzibati qaydada həbs olunanların Binəqədi təcridxanasında  saxlanma şəraitinin monitorinqini aparıb və orada saxlanılan 6 gənc fəal ilə görüşüb. Onlar dekabrın 29-da Fəvvarələr Meydanında etiraz aksiyasında iştiraka görə həbs olunublar.

E.Behbudov Turan-ın müxbiri ilə söhbətində bildirib ki, gənclər hər gün onlara eyni yeməyin – kotlet, makaron və mərci şorbasının verilməsindən şikayətləniblər.

Hüquq müdafiəçisinin sözlərinə görə, təcridxana rəhbərliyi bildirib ki, bu məsələ ondan asılı deyil, çünki yeməklər mərkəzləşdirilmiş qaydada gətirilir.

Bundan əlavə, E.Behbudovun sözlərinə görə, həbs olunanlar onlara qandalların taxılmasından şikayətləniblər.

Təcridxana rəhbərliyi bildirib ki, gənclər təcridxana əməkdaşının qanuni tələblərinə tabe olmayıblar, odur ki, nizamnaməyə əsasən 2 saat ərzində qandalda olublar.

Bununla yanaşı 18 sutkalığa həbs olunmuş Orxan Eyyubzadə bildirib ki, saxlanarkən Səbayel Rayon Polis İdarəsində ona güc tətbiq edilib.

E.Behbudov sözügedən məsələlərlə bağlı DİN rəhbərliyinə müraciət etmək niyyətindədir.

Gənclərin səhhətinə gəlincə, Samir Poladov ürək ağrısından şikayətlənib.

“Biz bu məsələni qaldırdıq. Bizə bildirdilər ki, gəncin xahişi ilə bir neçə dəfə təcili yardım çağırılıb. Yanvarın 5-də  şəhər kliniki xəstəxanasına aparılıb.  Ürəyinin elektrokardioqramması çəkilib, lakin problem aşkarlanmayıb. Bu, təcridxana rəhbərliyinin dedikləridir”, - E.Behbudov qeyd edib.

Qeyd edək ki, bundan əvvəl gənclər kameranın isti olmamasından və suyun olmamasından şikayətləniblər. Lakin E.Behbudovun sözlərinə görə, hazırda belə problem qeydə alınmayıb.

Bundan əlavə, hüquq müdafiəçisi təcridxanaya baş çəkdiyi zaman gənclər artıq eyni kameraya yerləşdirilib, halbuki, onlar bunun belə olmadığından şikayətlənmişdilər. 

Xatırladaq ki, 29 dekabr etiraz aksiyası Qarabağ qazisi Zaur Həsənovu intihar həddinə çatdıran məmur özbaşınalığına etiraz olaraq keçirilib.

Səbayel Rayon Məhkəməsi aksiyada iştiraka görə Müsavat Partiyasının fəalı Orxan Eyyubzadəni 18 sutka həbs edib. Partiyanın üzvü Tural Sadıqlı 17 sutka həbs olunub.  Təşkilat fəalı Cavid Hacıbəyli və AXCP üzvü Orxan Carçı 16 sutka, AXCP fəalı Türkel Əlisoy və bitərəf Samir Poladov 15 sutka həbs olunublar. 16 nəfər isə 300-600 manat arasında cərimələnib.—06B--