hüquq müdqafiəçilərinin həbsi ilə bağlı B Ə Y A N A T I

Azərbaycan hakimiyyəti öz xalqına qarşı repressiyaları davam etdirir. Ölkənin ictimai-siyasi fəallarına, qeyri-hökumət təşkilatlarına, xüsusilə insan haqlarının qorunması ilə məşğul olan qurumlara qarşı total hücum və repressiyalar davam etməkdədir. Son həftənin elə bir günü olmayıb ki, tanınmış ictimai xadimlərdən kimsə şərlənərək həbs olunmasın. 1937-ci ilin qaydalarını və terrorunu işə salan rejim Leyla Yunusun həbsinin ardınca, tanınmış alim, dünyada yüksək qiymətləndirilən konfliktoloq Arif Yunusu, həmçinin tanınmış hüquq müdafiəçisi, İnsan Haqları Klubunun rəhbəri Rəsul Cəfərovu şərləyib həbs ediblər.

8 avqust 2014-cü ildə isə İntiqam Əliyev həbs edilib, söz azadlığının və jurnalistlərin müdafiəsində böyük xidmətləri olan Reportyorların Azadlığı və Təhlükəsizliyi İnstitutuna basqılar olub, təşkilatın rəhbəri Emin Hüseynlinin həbsi barədə xəbərlər yayılıb. Bu silsilədən həbs olunan və saxlanılan şəxslərin əksəriyyəti siyasi məhbus məsələsi ilə bağlı razılaşdırılmış birgə siyahını imzalayan adamlardır və həbsin motivləri də məhz ölkənin içərisindən dolğun siyasi məhbus siyahısının hazırlanmasının qarşısını almaq, hakimiyyətin Azərbaycanda guya siyasi məhbusların olmaması barədə iddiaların beynəlxalq təsdiqinə nail olmaq cəhdidir.

Arif Yunus Dağlıq Qarabağ probleminin tarixi və konfliktin yaranma səbəbləri, Ermənistanın təcavüzkar siyasəti haqqında müxtəlif dillərdə nəşr olunmuş onlarla kitab və məqalənin müəllifidir. O, bu problemlə bağlı son 20 ildə dünyanın ən etibar etdiyi Azərbaycan müəlliflərindən biridir. Beynəlxalq aləmdə Qarabağ problemi ilə bağlı Azərbaycan mövqeyini müdafiə edən araşdırmaçılar bir qayda olaraq Arif Yunusun əsərlərinə istinad edirlər.

Rəsul Cəfərov yerli və beynəlxalq ictimaiyyətə 2012-ci ildə Bakıda keçirilən “Evrovizion” mahnı müsabiqəsi zaman diqqəti Azərbaycanda insan haqlarının kobud şəkildə pozulmasına yönəldən “Demokratiya naminə oxu” kampaniyasından yaxşı tanışdır. Sözügedən kampaniyanın koordinatoru olan R. Cəfərov sonrakı illərdə də ölkədə söz, mətbuat və sərbəst toplaşmaq azadlığının təmin olunması, xüsusən siyasi məhbusların probleminin gündəmə gətirilməsi, onların siyahısının hazırlanması və beynəlxalq təşkilatlara təqdim olunması istiqamətində ardıcıl fəaliyyət göstərib. Məhz son günlər həbsə alınan hüquq müdafiə təşkilatlarının rəhbərlərinin təşəbbüsü ilə hazırlanan Azərbaycan həbsxanalarında qanunsuz olaraq saxlanılan 97 siyasi məhbusun siyahısı 12 hüquq müdafiə təşkilatları, QHT-lər və müstəqil vəkillər tərəfindən imzalanaraq yerli və beynəlxalq ictimaiyyətə təqdim edilib. Son günlər həbs edilən insan hüquqlarının müdafiəçiləri bir sıra beynəlxalq konfranslarda, yüksək tribunalarda ölkəmizdə mövcud olan siyasi məhbus problemini gündəmə gətirirlər. Məsələn, Rəsul Cəfərov ölkədəki real mənzərəni əks etdirən video-roliklərin hazırlanmasında yaxından iştirak edib. Onun bu istiqamətdə ardıcıl və prinsipial fəaliyyəti həm yerli, həm də beynəlxalq səviyyədə qısa zaman ərzində tanınmasına, etibarlı tərəfdaş imicinin formalaşmasına səbəb olub.

İntiqam Əliyev ölkənin ən intellektual, ən savadlı və beynəlxalq etimad qazanmış peşəkar hüquq müdafiəçisidir. Onun tərəfindən Avropa İnsan Haqları Məhkəməsinə təqdim edilən şikayətlər bir qayda olaraq beynəlxalq məhkəmə orqanının müsbət qərarları ilə nəticələnir. Azərbaycanda hüquq maarifçiliyi işinin təşkili və təbliğində İntiqam bəyin müstəsna xidmətləri vardır. Əslində, İntiqam bəyin bütün şəffaf fəaliyyəti onun haqqında təmiz və xeyirxah adam imicini yaratmışdır.

Emin Hüseynli son bir neçə ildə öz fəallığı, obyektivliyi və prinsipiallığı ilə seçilən QHT nümayəndəsidir. O, müxtəlif təşkilatların təşəbbüsü ilə keçirilən beynəlxalq tədbirlərdə ölkəni layiqincə təmsil etmişdir.   

Milli Şura hesab edir ki, tanınmış hüquq müdafiəçiləri Leyla Yunus, İntiqam Əliyev, Rəsul Cəfərov, Emin Hüseynli və konfliktoloq Arif Yunusun həbsi hakimiyyətin siyasi sifarişidir və bir başa onların ictimai və sosial fəallıqları, demokratiya məsələləri və siyasi məhbus problemi ilə məşğul olmaları ilə bağlıdır. Milli Şura hakimiyyətdən ictimai siyasi fəallara, hüquq müdafiəçilərinə qarşı apardığı repressiyalara son qoymağı, bütün siyasi məhbusların qeyd- şərtsiz azad etməyi tələb edir.

80 avqust 2014-cü il