İctimai Birlik dustaqlara işgəncələrə son qoyulmasını tələb edir

“Siyasi Məhbuslarsız Azərbaycan” İctimai Alyansı 14 saylı həbsxanada dustaqlara mənfi münasibəti pisləyən bəyanat yayıb.

Sənəddə deyilir ki, məhkum Elşad Babayevin 2014-cü il dekabrın 22-də bu həbsxanada işgəncə ilə qətlindən sonra dustaqların kütləvi etirazı baş verib. Bu etirazlara görə məhbuslar işgəncələrə məruz qalıb, “kars”a salınıb, “tubzona”ya göndərilib, ailələrindən gizlədilib. Sənəddə həbsaxanada durumun hələ də gərgin qalmaqda davam etdiyi nəzərə çatdırılır. Həbsxana rəhbərliyi baş vermiş cinayətin üstünü açmaq əvəzinə göstərdikləri həmrəyliyə görə dekabrn 26-dan bu yana dustaqları davamlı işgəncəyə məruz qoymaqda ittiham edir. Həmrəylik göstərdiklərinə görə məhkum Rza Ağalı, İlham Hətəmov və daha 14 dustaq “kars”dadır. Dustaqlar Araz Quliyev, Anar Qasımlı, İsa Yaqubov da daxil olmaqla 10 dustaq vərəm dispanseri olan “tubzona” adlı yerdə saxlanılır. Onlarla bağlı hər-hansı məlumat yoxdur və hətta ailələrilə görüşə belə icazə verilmir. “Tubzona”ya aparılan məhbusların ailə üzvləri onların sağlam olduqlarını  deyiblər. Ailə üzvləri qeyd ediblər ki, dustaqların “tubzona”ya aparılmaları onlara verilən işgəncə faktlarını ört -basdır etmək üçündür. 

“Məhbusun işgəncə ilə öldürülməsi, cinayətin üstünü açmaq əvəzinə qalan məhbuslara işgəncə verilməsi, gizlədilərək ailə üzvlərilə görüş verilməməsi insanlıq adına utanc və biabırçılıqdır”, deyə müəlliflər 14 saylı həbsxanada dustaqlara olan münasibəti qınayırlar.

Alyans Qırmızı Xaç Komitəsinə, ATƏT-in Bakı ofisinə, Ombudsmana, Ədliyyə Nazirliyi yanında İctimai Komitəyə, hüquq müdafiəçilərinə müraciət edərək, 14 saylı həbsxanada “kars”da və “tubzona”da olan dustaqlarla görüşməyə, durumları haqda ictimaiyyətə bilgi verməyə çağırırlar.  

Sənəddə 14 saylı həbsxanada işgəncəyə məruz qalanların çoxunun dindarlar olduğu xatırladılaraq Qafqaz Müsəlmanları İdarəsinin sədri, Şeyxülislam Allahşükür Paşazadəyə burada din və insanlıq adına həqarət olan hadisələrə müdaxilə etməsi çağırışı səsləndirilir.

Müəlliflər dustaq Elşad Babayevin qatillərinin aşkara çıxarılıb cəzalandırılmasını, məhbuslara qarşı insan ləyaqətini alçaldan zorakı və işgəncə hərəkətlərə son qoyulmasını tələb edirlər. -05D-