İctimai Palata dekabrın 10-da parlament önündə piket keçirəcək

Bakı şəhər icra hakimiyyəti İctimai Palatanın Milli Məclis önündə dekabrın 10-na təyin etdiyi etiraz aksiyasına icazə verməyib. 

Aksiya Beynəlxalq İnsan Hüquqları Günü ilə əlaqədar saat 14.00-dan 15.00-a qədər “Siyasi məhbuslara azadlıq!”, “Toplaşmaq azadlığına məhdudiyyətlərə yox!”, “Saxta parlament buraxılsın!”, “İfadə, söz və ifadə azadlığı sərhəd tanımır!”, “Vicdan azadlığı hər kəsin haqqıdır!” və “İnsan hüquqlarına hörmət edin!” şüarları altında keçirilir.

Lakin meriya təşkilatçıların tələblərinin “əsassız” olması ilə əlaqədar aksiya keçirilməsini məqsədəuyğun görməyib.

Öz növbəsində, Müsavat Partiyasının sədr müavini Gülağa Aslanlı meriyanın qərarının əsassız olduğunu bildirib.

Onun sözlərinə görə, aksiya piket şəklində keçirilir və qanun 50-yə yaxın insanın iştirakı ilə piket keçirilən obyektin giriş-çıxışından 10 metrdən uzaq məsafədə təşkilinə yol verir. 

O bildirib ki, meriyanın qərarından məhkəməyə şikayət veriləcək.

Aksiyaya gəlincə, qadağa əsassız olduğu üçün parlament qarşısında piket keçiriləcək. -06D-