İctimai Palata rəsmi Naxçıvana xəbərdarlıq etdi

İctimai Palatanın Naxçıvan bölməsi bu günlərdə növbəti toplantısını keçirib. 

Toplantı Xocalı şəhidlərinin ruhlarını anımla başlayıb. Qurum Xocalı faciəsi və Naxçıvandakı ictimai-siyasi durumu müzakirə edərək bəyanat verib.

Bəyanatda 1992-ci ilin fevralında Xocalıda minlərlə Azərbaycan vətəndaşlarına soyqırım aktını həyata keçirənlərin erməni və rus hərbi birləşmələri olduğu deyilir. Dünyanın bəzi ölkələri bu faciəni soqırım kimi tanısa da, Azərbaycan dövlətinin bu qətliyama ölkə parlamentində hüquqi-siyasi qiymət verməməsi, rəsmən soyqırım kimi tanımaması diqqətə çatdırılır. İqtidarın bu münasibəti utancverici və şəhidlərə təhqir sayılır.  İqtidarın Xocalı soyqırımı ilə bağlı tədbirlər keçirməsi saxta vətənpərvərlik adlandırılır. 

Naxçıvandakı ictimai-siyasi durumla bağlı bəyanatda deyilir ki, 2013-cü il seçki ili olduğu üçün ölkəboyu ictimai-siyasi durum gərginləşir. Bütün ölkədə olduğu kimi, Naxçıvanda da yerli hakimiyyət siyasi fəallara represiyalar vasitəsilə bölgəyə nəzarəti əlində saxlamaq istəməkdə ittiham edilir.   

Pozulmuş hüquqlarını müdafiə etdiyi üçün İctimai Palatanın üzvü Əşrəf Həsənovun ailəsi ilə birlikdə təqibə rüşvət vermədiyi üçün iş adamları Məhəmməd Qurbanov və kürəkəni Nadir Məmmədovun gömrükdə saxta ittihamlarla həbs olunmaları, ailələrinə 20 min manata yaxın ziyan vurulduğu xatırladılır. Digər İP üzvlərinin xüsusi xidmət orqanları tərəfindən hədələndikləri iddia edilir. 

Sənədin sonunda Naxçıvan hakimiyyətinə vətəndaşlara və o cümlədən İctimai Palata üzvlərinə qarşı repressiyalar dayanmadığı halda bölgədə idarəolunmaz sosial partlayışlar baş verəcəyi xəbərdarlığı edilir. Bu arzuolunmaz hadisələrin isə hər kəsin və hamının ziyanına olacağı nəzərə çatdırılır. -05D-