Xədicə İsmayılova vətəndaş itaətsizliyi nümayiş etdirir

 Məhkəmə icraçıları yanvarın 26-da Bakıda etiraz aksiyaları zamanı saxlanılan fəallardan cərimələrin alınmasına başlayıb. Bu aksiya İsmayıllı sakinləri ilə həmrəylik əlaməti olaraq keçirilib və aksiyanın üç iştirakçısı 13-15 gün müddətinə həbs edilib, daha 15 nəfər isə 300-2500 manat cərimələrə məruz qalıb.

Bu gün jurnalist Xədicə İsmayılova Binəqədi rayon məhkəmə qərarlarının icrası şöbəsinə çağırılıb. Burada ondan 400 manat cərimə ödəməyi tələb ediblər.

Jurnalistin Turan-a verdiyi məlumata görə, o, yazılı olaraq cərimə ödəməkdən imtina edib, belə ki, məhkəmənin qərarı qanunsuz, polislərin saxta ifadələrinə əsaslanan qərar hesab edir.

Jurnalistə cəriməni ödəməyəcəyi təqdirdə ona CM-in müvafiq maddəsinin şamil edilə biləcəyi barədə xəbərdarlıq ediblər. Bundan sonra İcra şöbəsinin işçisi İsmayılovaya “dostcasına” cəriməni “hissə-hissə ödəməyi” məsləhət görüb. Məsləhəti üçün təşəkkür edən jurnalist vətəndaş itaətsizliyi nümayiş etdirməkdən başqa çıxış yolu olmadığını qeyd edib. “Buna görə cəriməni ödəməyəcəyəm”, deyə İsmayılova bildirib.

Qeyd edək ki, CM-in 306-cı maddəsinə əsasən, məhkəmə qərarının icra edilməməsi 2 ilədək azadlıqdan məhrumetmə cəzasına səbəb ola bilər. -16D06-