İctimai Palata Zaur Qurbanlının həbsdən azad edilməsini tələb edir

İctimai Palatanın Koordinasiya Şurası və Gənclər Təşkilatı “Nida” Vətəndaş Hərəkatının İdarə Heyətinin üzvü Zaur Qurbanlının həbsinin pisləyir və gənc fəalın dərhal azadlığa buraxılmasını tələb edir.  Bu barədə hər iki qurumun yaydığı bəyanatda deyilir.     

Sentyabrın 29-da Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin əməkdaşları “Nida” Vətəndaş Hərəkatının ofis kimi istifadə etdiyi məkanda axtarış aparıb. Yoxlama zamanı qurumun rəsmi saytı ilə bağlı təbliğat materialları polis tərəfindən götürülüb. Z.Qurbanlı heç bir əsas göstərilmədən polis əməkdaşları tərəfindən saxlanılıb və naməlum istiqamətə aparılıb. Hazırda onun harada olması barədə dəqiq məlumat yoxdur. 

Gənclər Təşkilatı ehtimal edir ki, Z.Qurbanlı ölkə rəhbəri barədə broşür hazırladığı üçün həbs olunub. 

İP Koordinasiya Şurası və Gənclər Təşkilatı Z.Qurbanlının həbsini kəskin şəkildə pisləyir, həbsi gənclərə qarşı repressiyanın növbəti tərkib hissəsi kimi qiymətləndirir. 

“Hakimiyyətdən Zaur Qurbanlını ən qısa zamanda azadlığa buraxılmasını və həbs zamanı alınan materialların geri qaytarılmasını tələb edirik”, -  Gənclər Təşkilatının bəyanatında deyilir. -03D-