İlham Əliyev "Azəri-Mərkəzi-Şərqi"də karbohidrat hasilatı layihəsinin həyata keçirilməsi üzrə işlərin gedişatı ilə tanış olub

Bakı/04.04.23/Turan: Bu gün Bayıl tikinti-quraşdırma sahəsində Azərbaycan prezidenti İlham Əliyevin iştirakı ilə "Azəri-Mərkəzi-Şərqi" platformasının üst modullarının dənizə rəmzi yola salınması mərasimi keçirilib.

Bu ilin martında "Azəri-Mərkəzi Şərqi" platformasının dayaq bloku dənizə yola salınıb.

Layihə çərçivəsində ilk neft hasilatının 2024-cü ilin birinci rübündə başlayacağı planlaşdırılır.

Layihə 2017-ci ildə "Azəri-Çıraq-Günəşli" (AÇG) üzrə Hasilatın Pay Bölgüsü Sazişinin (HPBS) 2049-cu ilə qədər uzadılmasına uyğun olaraq həyata keçirilir.

"Azəri-Mərkəzi-Şərqi" layihəsinin məqsədi əlavə quyuların qazılması və əlavə dəniz obyektlərinin quraşdırılması sayəsində gündəlik 100 min barelə qədər neft və 350 min kub futa qədər qaz hasilatına nail olmaqdan ibarətdir.

Dəyəri 6 milyard dollar olan layihəyə yeni dəniz platforması və gündəlik 100 min barelədək hasilat gücündə digər qurğular daxildir. Layihənin istismar müddəti ərzində ümumilikdə 300 milyon barelədək neftin hasil olunacağı proqnozlaşdırılır.

Mərasimdə BP-nin Azərbaycan, Gürcüstan və Türkiyə üzrə regional prezidenti Gary Johns və "Azəri-Mərkəzi-Şərqi" layihəsinin baş diroktoru Nil Filips də iştirak ediblər. Onlar dövlət başçısına layihənin həyata keçirilməsi üzrə tədbirlər haqqında məlumat veriblər. 06В