İlham Əliyev dünya azərbaycanlılarını təbrik edib

Bakı/29.12.20/Turan: Prezident İlham Əliyev hər il dekabrın 31-də qeyd olunan Dünya Azərbaycanlılarının Həmrəylik Günü münasibətilə həmvətənlərinə təbrik ünvanlayıb.

Müraciətdə 27 sentyabr - 10 noyabr Vətən Müharibəsinə geniş yer ayrılıb.

"Müzəffər Azərbaycan Ordusu hər anı qəhrəmanlıqlarla dolu 44 gün ərzində düşməni ağır məğlubiyyətə uğratmış və ölkəmizin ərazi bütövlüyünü bərpa etmişdir”, deyə müraciətdə qeyd edilir.

Dekabrın 10-da Bakıda keçirilmiş Zəfər Paradına toxunan Əliyev bu paradın Azərbaycan dövlətinin siyasi, iqtisadi və hərbi qüdrətini, xalqımızın iradəsini, ordumuzun qələbə əzmini, əsgər və zabitlərimizin sarsılmaz döyüş ruhunu nümayiş etdirdiyini qeyd edib.

İ.Əliyev Ermənistanın işğalı və vəhşiliyi nəticəsində başdan-başa dağıdılmış Qarabağın ən qısa zamanda əsl cənnətə çevriləcəyini vurğulayıb.

Prezident dünya azərbaycanlılarına Azərbaycanın daha da güclənməsi və çiçəklənməsi naminə fəaliyyətlərində uğurlar arzulayıb. -06D-