İlham Əliyev: Ermənilərin istənilən hərbi obyektini məhv edə bilərik

Bakı/12.07.17/Turan: Azərbaycanın xarici siyasətinin əsas komponenti Qarabağ münaqişəsinin həllidir, bu barədə dövlət başçısı İlham Əliyev çərşənbə günü Nazirlər Kabinetinin iclasında çıxış edərkən bildirib.

"Təəssüf ki, birinci yarımildə bu istiqamətdə heç bir nailiyyət əldə olunmayıb", deyə o qeyd edib.

O, Ermənistan hakimiyyətinin təşəbbüsü ilə dünyada heç kimin tanımadığı növbəti qanunsuz referendumu keçirən Qarabağ separatçılarını pisləyib.

"Bu referendumun tanınmaması Qarabağın Azərbaycana məxsus olmasının etirafıdır", deyə Əliyev bildirib.

Aprel müharibəsindən sonra ermənilər danışıqların davam etdirilməsi üçün şərtlər irəli sürməyə çalışıblar, amma buna nail ola bilməyiblər.

"İndi konkret danışıqları bərpa etmək lazımdır. İşğal edilmiş ərazilər azad edilməli, Azərbaycanın ərazi bütövlüyü bərpa edilməlidir, bunsuz nizamlanma mümkün deyil", deyə Əliyev qeyd edib.

Cəbhədə hazırki vəziyyətə toxunan prezident qeyd edib ki, bu yaxınlarda vəziyyətin gərginləşməsi Ermənistan tərəfin danışıqları istəməməsi və buna görə cəbhədə təxribat, xüsusən iyulun 4-də Alxanlı kəndinə atəş açılmasını təşkil etməsi ilə bağlı idi.

"Onlar ümid edirdilər ki, Azərbaycan danışıqlardan imtina edəcək, amma biz buna uymadıq", deyə Əliyev bildirib. O, həmçinin problemin güc yolu ilə həll edilməsi, düşmənin istənilən obyektinin məhv edilməsi üçün ölkənin kifayət qədər qüvvəsi olduğunu vurğulayıb. -03D-