İlham Əliyev Ermənistanla "uzunmüddətli sülhün" şərtlərini açıqlayıb

Bakı/23.06.23/Turan: Prezident İlham Əliyev Ermənistanla "uzunmüddətli sülhə" nail olmağın şərtlərini açıqlayıb. Bu, ermənistanın Azərbaycanın ərazi bütövlüyünü tanıması, Zəngəzur dəhlizinin açılması və Ermənistan qoşunlarının Qarabağdan çıxarılmasıdır.

Müdafiə Nazirliyinin komando hərbi hissələrinin birinə Döyüş bayrağının təqdim olunması mərasimində çıxışı zamanı Əliyev keçən ilin oktyabr ayında Azərbaycanın ərazi bütövlüyünü rəsmən tanıdığını, ötən ay isə hətta ölkəmizin ərazisinin parametrlərinin qeyd olunduğunu xatırladıb və bu ifadələrin kağız üzərində də olmasının və Ermənistan buna imza atmasının zəruriliyini diqqətə çatdırıb. 

"Belə olan halda Cənubi Qafqazda uzunmüddətli sülh yarana bilər", deyə prezident bildirib.

Əliyev sülh üçün digər mühüm şərtlərin Zəngəzur dəhlizinin açılması və Ermənistan ordusunun silahlı birləşmələrinin Qarabağ bölgəsindən çıxarılması olduğunu vurğulayıb. 

Əliyev həmçinin qeyd edib ki, "strateji yüksəkliklərdə olmaq" Azərbaycana "strateji üstünlük" verir.

Onun sözlərinə görə, son iki il yarım ərzində Azərbaycan öz ordusunu xeyli gücləndirib. "Əgər bütün bu amilləri Ermənistan və onun arxasında dayanan xarici qohumları başa düşmürlərsə, onda günah onların boynundadır", deyə Azərbaycan prezidenti qeyd edib.

"Bu müddət ərzində biz bir neçə dəfə məcbur olub Ermənistan tərəfinə öz gücümüzü göstərmişik, birincisi, onların hərbi təxribatlarına cavab olaraq. İkincisi, onlara bir siqnal göndərmişik ki, özlərini yaxşı aparmasalar, öz imzalarına hörmət etməsələr nəticə onlar üçün acınacaqlı olacaq", deyə Əliyev sözünə davam edib.

Bununla belə, o qeyd edib ki, Azərbaycan problemin dinc yolla həllinə üstünlük verir və güc metodlarından istifadə etməyə tələsmir.

"Ona görə hələ də özümüzü təmkinlə aparırıq. Biz heç vaxt tələskənliyə yol verməmişik, buna ehtiyac yoxdur. Bu gün güc də bizim tərəfimizdədir, zaman da bizim mövqeyimizi gücləndirir, beynəlxalq hüquq da. Dünya ictimaiyyəti artıq birmənalı şəkildə Qarabağı Azərbaycanın ayrılmaz hissəsi kimi tanıyır. Biz gözləyə bilərik. Yenə də deyirəm, biz tələsmirik", dövlət başçısı bildirib. 06В