İlham Əliyev Ramazan ayı münasibətilə İslam ölkələrinin səfirlərini qəbul edib

Avqustun 13-də prezident İlham Əliyev müqəddəs Ramazan ayı münasibətilə müsəlman ölkələrinin Azərbaycandakı səfirlərini və diplomatik nümayəndəliklərinin rəhbərlərini qəbul edib. 

Görüş zamanı dövlət başçısı deyib: “Azərbaycan öz xarici siyasətində İslam ölkələri ilə əməkdaşlığa xüsusi önəm verir. Biz bütün beynəlxalq təşkilatlarda müsəlman ölkələrinin mövqeyini müdafiə edirik və bu qarşılıqlı dəstək bizi daha da gücləndirir. Qeyd etməliyəm ki, biz nəinki ikitərəfli formatda, eyni zamanda, beynəlxalq təşkilatlar çərçivəsində əməkdaşlığı dərinləşdiririk. Biz İslam Əməkdaşlıq Təşkilatının fəaliyyətində quruma üzv ölkələrin dəstəyini daim hiss edirik. Birləşmiş Millətlər Təşkilatında qarşılıqlı dəstək çox əhəmiyyətlidir. Keçən il Azərbaycan BMT Təhlükəsizlik Şurasına üzv seçilib. Bu seçkilərdə müsəlman ölkələrinin çox böyük rolu olub. 155 ölkənin Azərbaycanın namizədliyini dəstəkləməsi, eyni zamanda, müsəlman aləminə olan hörmətin təzahürü idi. 

Ermənistan-Azərbaycan, Dağlıq Qarabağ münaqişəsində də biz daim müsəlman ölkələrinin dəstəyini hiss etmişik. Bu dəstək bizim üçün çox əhəmiyyətlidir. Bildiyiniz kimi, uzun illərdir ki, beynəlxalq hüquq normaları kobudcasına pozulur. Ölkəmizin beynəlxalq birlik tərəfindən tanınmış sərhədləri pozulub. Azərbaycanlılara qarşı soyqırımı siyasəti həyata keçirilib. Yenə də Xocalı soyqırımının rəsmən soyqırımı kimi tanınması müsəlman aləmindən başlayıb. Xocalı soyqırımını soyqırımı kimi birinci Pakistan dövləti tanıyıb və buna görə biz qardaş ölkəyə minnətdarlığımızı bildirmək istəyirik. 

Biz Azərbaycanda İslam həmrəyliyinin güclənməsinə də böyük əhəmiyyət veririk. Xüsusilə, indiki zəmanədə buna daha da böyük ehtiyac var. 

Azərbaycanda gedən proseslərə İslam Əməkdaşlıq Təşkilatı tərəfindən müsbət qiymətin verilməsi bizi daha da ruhlandırır. İslam dəyərləri bizim üçün əzizdir, doğmadır. Bizim milli dəyərlərimizin təməlində İslam dəyərləri dayanır. 

Əlbəttə, biz çalışmalıyıq ki, bütün müsəlman aləmi daha da sıx birləşsin, qarşımızda duran problemlər həll olunsun, gələcəkdə bir-birimizə daha da böyük dəstək verə bilək. Biz istəyirik ki, bütün müsəlman ölkələrində sülh, əmin-amanlıq olsun, qan tökülməsin, vətəndaş müharibəsinə yol verilməsin. 

Ərəb Liqasının Yaxın Şərqdə gedən proseslərlə bağlı mövqeyini Azərbaycan ilk günlərdən dəstəkləyib. Biz bu gün də bu dəstəyi veririk. Eyni zamanda, BMT Təhlükəsizlik Şurasında da Ərəb Liqasının mövqeyini müdafiə edirik və bundan sonra da müdafiə edəcəyik”. -02D-