İslamçılar Qüds Gününü qeyd ediblər

Qarabağın işğalı əsası Qüdsün işğalı ilə qoyulmuş  beynəlxalq ekspansionizm və etnik təmizlənmə siyasətinin davamıdır. Bu fikir bu gün Qüds Günü münasibətilə Azərbaycan İslam Partiyasının (AİP) mənzil-qərargahında keçirilən “dəyirmi masa”da səslənib.

Beynəlxalq Qüds Günü İran islam inqilabının lideri Xomeyni tərəfindən təsis edilib və hər il Ramazan ayının sonuncu cümə günü Qüdsün israillilər tərəfindən işğalına etiraz olaraq keçirilir.

Qüdsün işğalı yalnız fələstinlilərin deyil, ədalətsizliyə və təqiblərə məruz bütün müsəlmanların faciəsinə çevrilib. “Qarabağın işğalı da məhz bu siyasətin nəticəsidir”, - AİP sədrinin müavini Akif Heydərli bildirib.

Dini hüquq müdafiəçisi İlqar İbrahimoğlu qeyd edib ki, Qüds Günü ədalətsizliyə, təqiblərə müqavimətin, azadlıq uğrunda mübarizənin rəmzidir. Onun fikrincə, Azərbaycan Şimali Afrikada və Yaxın Şərqdə başlamış proseslərdən kənarda qalmır. 2006-2008-ci illərdə Azərbaycan müsəlmanları Qüds günləri keçirərək islamofobiyaya, peyğəmbərin karikaturasına etirazlarını bildiriblər, İsrailin Livana və Qəzzaya daxil olmasını kəskin şəkildə pisləyiblər. Məhz bütün bunlara görə son illər Azərbaycanda dindarlara qarşı repressiyalar baş verir.

Nardaran ağsaqqalı Hacıağa Nuriyevin fikrincə, dünya dövlətlərinin Qarabağa dair siyasəti bu regionun Azərbaycandan qoparılmasına yönəlib. İşğal olunmuş ərazilərin azad edilməsinin yeganə yolu Azərbaycan xalqının öz əlindədir.

Tədbir iştirakçıları qəbul etdikləri bəyanatda Azərbaycan hakimiyyətini Qüds Gününə laqeyd qalmamağa çağırıblar. -06D-