İlham Əliyev Yaqlandı ittiham edir

İlham Əliyev Yaqlandı ittiham edir

Bakı/15.11.17/Turan: Azərbaycan könüllü olaraq Avropa Şurasından çıxa bilər. Bu fikri dünən dövlət başçısı İlham Əliyev Bakıda Yeni Azərbaycan Partiyasının 25 illiyinə həsr olunmuş təntənəli mərasimdə çıxışında bildirib.

"Biz 15 ildən çoxdur ki, Avropa Şurasının fəal üzvüyük və bir çox tədbirlər bu təşkilatın xətti ilə keçirilmişdir. Ancaq son vaxtlar Avropa Şurasının baş katibinin fəaliyyəti nəticəsində bu qurum ilə Azərbaycan arasında süni böhran yaradılmışdır", deyə o bildirib.

"Bu böhranın təşəbbüskarı biz deyilik. Biz, sadəcə olaraq, bizə qarşı aparılan riyakar və ədalətsiz siyasətlə bağlı adekvat addımlarımızı atırıq", deyə Əliyev sözünə davam edib.

"Əgər bu böhran dərinləşsə, onda əlbəttə ki, Azərbaycan öz seçimində tam azad olacaqdır. Biz üzv olduğumuz bütün təşkilatlara könüllü şəkildə daxil olmuşuq və könüllü şəkildə də çıxa bilərik", deyə Əliyev bildirib.

Xatırladaq ki, Bakı və Strasburq arasındakı münasibətlərdə böhran uzun müddətdir davam edir. Avropa Şurası baş katibi T.Yaqland Avropa Şurasına daxil olarkən qəbul etdiyi öhdəliklərinə məhəl qoymayan təşkilatın üzv ölkəsini cəzalandırmaq mexanizmini (46-cı maddə) işə saldıqdan sonra böhran daha da dərinləşib.

Bu öhdəliklərdən biri Avropa İnsan Hüquqları Məhkəməsinin qərarlarının mütləq icrasıdır. Bakı artıq neçə ildir ki, AİHM-nin siyasi məhbus kimi tanınan İlqar Məmmədov barəsində qərarlarını yerinə yetirmir.

Hazırda Strasburqda Azərbaycanın təşkilatdan çıxarılması prosedurunun rəsmiləşdirilməsi prosesi gedir və bu proses bu il yekunlaşa bilər. -02D-