İlham Əliyevin Paris görüşləri

Bakı/20.07.18/Turan: Azərbaycan Fransanı özünə çox yaxın tərəfdaş, dost ölkə hesab edir və əməkdaşlığın daha da genişləndirilməsində maraqlıdır. Bu barədə dünən prezident İlham Əliyev Parisdə Senat sədri Jerar Larşe ilə görüşündə bildirib.

Görüşdə parlamentlərarası əlaqələrin çox yüksək səviyyədə olduğu qeyd edilib, bu əməkdaşlığın daha da inkişaf etdirilməsi zərurəti vurğulanıb.

Bundan başqa, Fransa və Azərbaycan arasında münasibətlərin, görüşlər zamanı aparılan müzakirələrin Azərbaycan və Avropa İttifaqı arasında imzalanacaq sazişə müsbət töhfə verəcəyi qeyd edilib.

Senat sədri Avropa İttifaqı və Azərbaycan arasında hərtərəfli Sazişin yaxın gələcəkdə imzalanacağına ümid etdiyini deyib. Fransanın bu sənədin imzalanmasında çox maraqlı olduğu bildiriib.

Həmçinin, Ermənistan-Azərbaycan münaqişəsi müzakirə edilib. Senat sədri qeyd edib ki, Fransa Qarabağ münaqişəsinin sülh yolu ilə həlli məqsədilə fəaliyyəti davam etdirmək niyyətindədir.

Əliyev səfər zamanı həmçinin Fransanın bir sıra aparıcı şirkətlərinin rəhbərləri ilə görüşlər keçirib.

Belə ki, TOTAL şirkətinin icraçı direktoru Patrik Puyanne ilə görüşdə "Abşeron" qaz-kondensat yatağının işlənməsi ilə bağlı fikir mübadiləsi aparılıb.

Həmçinin, TOTAL-ın Xəzərin Azərbaycan sektorunda "Ümid-Babək" qaz yataqlarının işlənməsində iştirakı mümkünlüyü müzakirə olunub.

NAVAL qrupunun baş direktoru Erve Qiyu ilə görüşdə Azərbaycan və Fransa arasında hərbi-sənaye sahəsində əməkdaşlıq məsələləri müzakirə olunub.

Hərbi-texniki sahədə əməkdaşlıq üçün yaxşı imkanlar olduğu qeyd edilib. Hazırda Fransa tərəfi ilə konkret layihələr üzərində iş aparılır, deyə məlumatda bildirilir.

Əliyev Thales İnternational, Wilmotte & Associés Architectes, SUEZ və Airbus şirkətlərinin rəhbərləri ilə görüşüb. -06D-