İran: ABŞ Suriyaya hücum edərsə, münaqişə bütün regionu əhatə edəcək

İranın Xarici İşlər Nazirliyi bildirib ki, Amerikanın Suriyaya hücumu bütün regionu münaqişəyə cəlb edəcək. Bu barədə Bloomberg agentliyi məlumat yayıb.

“Biz Qərbi Suriyada hərbi qüvvədən istifadə etməkdən çəkinməsini istərdik”, - İran XİN-in nümayəndəsi Abbas Araqçı bildirib. Onun sözlərinə görə, region üçün nəticələr ağır olacaq, bunun törətdiyi  fəsadlar isə təkcə Suriya ilə kifayətlənməyəcək, bütün regionu əhatə edəcək.

Araqçının bəyanatı ABŞ dövlət katibi Con Kerri Suriya hökumətinin avqustun 21-də Dəməşq yaxınlığında  kimyəvi maddədən istifadə etməsi barədə “danılmaz” sübutların olduğunu bəyan etdikdən bir gün sonra səslənib.

Suriyadakı bəzi müxalifət təşkilatları bildirirlər ki, hücum zamanı 1300-dən çox adam həlak olub. Bu bəyanat hələlik təsdiqlənməyib.

Araqçı hər hansı şəraitdən asılı olmayaraq kimyəvi silahın tətbiq edilməsini pisləyib. O, ABŞ-ı və onun müttəfiqlərini Suriyaya zərbə endirmək üçün bundan bəhanə kimi istifadə etməkdə suçlayıb.

Qəribədir ki, Suriyaya intervensiya məsələsində Ankara Vaşinqtonu dəstəkləyir. Ərdoğan hökuməti Əsədin devrilməsini istəyir, ona görə yox ki demokratiya uğrunda mübarizə aparır, ona görə ki, Əsədin gedişi Suriyada islamçıların hakimiyyətə gəlməsinə yol açır.

Ərdoğan Misirdə islamçı Mursinin timsalında sadiq müttəfiqini artıq itirib və indi Suriyada revanş götürmək istəyir. -02D-