İran Azərbaycanla sərhəd məntəqələrini bağlayıb

Noyabrın 8-dən İran tərəfi Azərbaycanla sərhəddə bütün sərhəd məntəqələrini bağlayıb. Bunun səbəbləri məlum deyil. Turan-ın bölgə müxbirinin məlumatına görə, noyabrın 6-da İranla Naxçıvan sərhədində insident baş verib. İran tərəfdən Araz çayının Azərbaycan tərəfində işləyən traktora atəş açılıb. 

Azərbaycan tərəfi atəşin səbəbləri ilə bağlı sorğu göndərib. Bundan sonra nəzarət-buraxılış məntəqəsi bağlanıb. İndiyədək sorğuya cavab verilməyib.

Hazırda böyük sayda Azərbaycan vətəndaşı sərhəddə nəzarət-buraxılış məntəqələrində İrana getmək üçün icazə gözləyirlər. 

Azərbaycan tərəfi sərhədin nə zaman açılacağı barədə sualı hələ ki cavablandıra bilmir. 

Rəsmi Bakı hələlik sərhəddin bağlanmasını şərh etmir. Gömrük nümayəndəsi qeyri-rəsmi söhbət zamanı etiraf edib ki, İran səbəbləri açıqlamadan sərhəddi bağlayıb. 

Öz növbəsində İranın Bakıdakı səfirliyi sərhəddin bağlanması xəbərini təsdiq edib. İran tərəfi buna səbəb kimi Azərbaycan tərəfdən “Şahtaxtı” (Naxçıvan) nəzarət-buraxılış məntəqəsinin bağlandığını göstərib. Lakin Turan-ın bölgə müxbiri Naxçıvandan bildirib ki, 

“Şahtaxtı” (Naxçıvan) nəzarət-buraxılış məntəqəsində Azərbaycan tərəfdən yol açıqdır. “Azərbaycanlı vətəndaşların olduğu avtobus ora gedib, lakin İran tərəfdə dayandırılıb”, - müxbir bildirib.

Qeyd edək ki, iki ölkə sərhədində 5 nəzarət-buraxılış məntəqəsi fəaliyyət göstərir – ikisi Naxçıvanda, üçü Azərbaycanın cənubunda. 

Hər gün hər iki tərəfdən bir neçə min adam bu keçidlərdən istifadə edir. -05B-