İran hakimiyyəti Azərbaycan vətəndaşlarının həbs edilməsini rəsmi kanallar vasitəsilə təsdiqləyib

İran hakimiyyəti Azərbaycan vətəndaşlarıı - ədib Xalidə Xalidin və onun sürücüsü Şamxal Hüseynovun həbsini rəsmi kanallar vasitəsilə təsdiqləyib. 

İİR xarici siyasət idarəsinin Azərbaycanın notasına cavabında deyilir ki, X.Xalid və Ş.Hüseynov “qanunsuz fəaliyyətə cəhdə görə” həbs olunublar.

Lakin Azərbaycan vətəndaşlarının konkret nədə ittiham olunduğu dəqiqləşdirmir. Bu barədə Azərbaycan XİN mətbuat xidməti məlumat yayıb.

Eyni zamanda XİN-dən qeyd olunub ki, Təbrizdəki Baş Konsulluq həbs olunanlara lazımi hüquqi yardım göstərəcək.

X.Xalid AMEA Nizami adına Ədəbiyyat İnstitutunun elmi əməkdaşıdır. O, aprelin 30-da Təbrizdə ədib Oxtay Rəşidinin evində Ş.Hüseynov və iranlı azərbaycanlıların hüquqları uğrunda hərəkatın 4 fəalı ilə birlikdə həbs olunub.  Həbs ETTELAAT tərəfindən həyata keçirilib.

Azərbaycan tərəfi öz vətəndaşlarının taleyinə aydınlıq gətirilməsi məqsədilə mayın 1-də və 6-da İrana nota verib. —06D--