Qanun zabitlərin tərəfində olsa da, onlar hələ ki, evlə təmin olunmur

“Ehtiyatda olan Zabitlər Birliyi” çərşənbə axşamı ofisində hərbi xidməti başa vurmuş zabitlərin mənzil hüquqlarının pozulması ilə bağlı dəyirmi masa keçirib.

Birliyin rəhbəri Yaşar Cəfərli Dövlət Sərhəd Xidmətinin 9 ehtiyatda olan zabitinin bu məsələ ilə bağlı müraciət etdiyini deyib. Birlik ölkə qanunvericiliyinə isnadən zabitlərin mənzil hüquqlarının təmin olunması üçün əlindən gələni əsirgəməyəcəyini bəyan edib. Y.Cəfərli ölkədə dövlətin mənzillə təmin etməyə borclu olduğu 14-15 min nəfərə yaxın zabit sayı olduğunu deyib. 

20 təqvim ilindən çox silahlı qüvvələrdə xidmət etmiş zabitlərin evlə təmin olunmasının qanunda əksini tapdığını, bununla bağlı 2012-ci ildə dövlət başçısı İlham Əliyevin sərəncam imzaladığı xatırladılıb. Amma buna baxmayaraq, məsələ hələ də həllini tapa bilmir.  

Haqqında danışılan evlə təmin olunmayan zabitlər Cəlilabadın Göytəpə qəsəbəsindkəi hərbi hissədəki qapalı şəhərcikdə yaşayırlar. Evlə təmin olunmaları haqda iki ildir ki, bütün instansiyalara müraciət ediblər. Bütün instansiyalar zabitlərə cavablarında tələblərində haqlı olduqlarını bildirsələr də, bu haqlılıq sözdən o yana keçməyib. Müraciətlərin heç bir nəticə vermədiyini görən zabitlər məhkəməyə müraciət ediblər. Hazırda zabitlərin işi Şirvan inzibati-iqtisad məhkəməsində baxışdadır. 

Y.Cəfərli qeyd edib ki, zabitlərin ev məsələsini həll etmək üçün yaxın günlərdə Nazirlər Kabinetinə, Ombudsmana, Sosila Müdafiə Fonduna və Dövlət Sərhəd Xidməti rəhbərliyinə müraciət etməyi nəzərdə tutulduğunu söyləyib. -05C-