Siyasi məhbus siyahısı AŞPA-da müzakirəyə çıxarılsın

Müsavat Partiyasının başqan müavini Tofiq Yaqublunun Hüquqlarını Müdafiə Komitəsi çərşəmbə axşamı Müsavat Partiyasının ofisində dəyirmi masa keçirib.

Komitə sədri Qubad İbadoğlu T.Yaqublunun həbsinin özünü əsassız adlandırıb. Bu həbsi xalq fəallığının artması fonunda iqtidarın qorxusu kimi dəyərləndirib. 

Komitə sədri onu da bildirib ki, həbsdə olan siyasi dustaqların müdafiə komitələri əlaqəli fəaliyyəti təmin etmək üçün bu komitələrin Koordinasiya Şurasını yaratmağı qərara alıb. T.Yaqublunun həbsilə bağlı iş mayın 6-da Avropa Məhkəməsinə göndərilib. 

Xalq Cəbhəsi Partiyasının sədri Əli Kərimli müdafiə işinin daha da gücləndirilməsini vacib sayıb. Onun fikrincə, belə siyasi həbslərə son qoymağın yolu müxalif qüvvələrin geniş formatda birliyinin yaradılması və xalq kütlələrini hərəkətə gətirməsindən keçir. Daha sonra Ə.Kərimli ölkədə siyasi həbslərin qarşısını almaq üçün AŞPA-nın Azərbaycanda siyasi məhbus məsələsi üzrə məruzəçisi Kristofer Ştrasserin siyasi məhbus siyahısını yenidən AŞPA-nın müzakirəsinə çıxarmağı təklif edib. 

Dini Etiqad və Vicdan Azadlığını Müdafiə Mərkəzinin rəhbəri İlqar İbrahimoğlu demokratik qüvvələrin dindarların müdafiəsinə tam ciddi yanaşmadığını deyib. Bu mövqeyi aradan qaldırmağın lazım gəldiyini vurğulayıb. 

Müsavat Partiyası başqanı İsa Qəmbər müdafiə məsələsində həm uğurların, həm də çatışmazlıqların olduğunu deyib. Xalqın artan ictimai-siyasi fəallığını iqtidarın həbslər yolu ilə yatırmaq istəməsini səhv addım adlandırılıb. Hakimiyyətə “ağlına başına yığaraq” siyasi məhbusları azad etmək çağırışı edilib. 

Müsavat başqanı tətbiq edilən amnistiya aktına da münasibət ifadə edib. Üç dəfə amnistiya aktı tətbiq olunmasına baxmayaraq, bunun siyasi məhbuslara, dindarlara şamil olunmaması pislənilib. “Bilərəkdən elə maddələr seçilir ki, hər dəfə siaysi məhbuslar amnistiya aktından kənarda qalır, cərimələr belə amnistiyaya düşmür”, - deyə İ.Qəmbər mövqeyini ifadə edib.

T.Yaqublu yanvarın 26-da İsmayıllıda baş vermiş hadisələrlə bağlı fevralın 4-də Bakıda həbsə alınıb. İki İsmayıllı sakini onun üzünə duraraq əhaliyə polisə tabe olmamaq çağırışı etdiyini bildiriblər. Daha sonra isə İsmayıllı polisinin 3 əməkdaşı T.Yaqubluya qarşı iğtişaş törətmək və s. haqqında ifadə veriblər. -05C-