İran islam inqilabının 39-cu ildönümünü qeyd edir

Bakı/10.02.18/Turan: Fevralın 11-də İranda 1979-cu ildə baş vermiş islam inqilabının 39-cu ildönümü qeyd olunacaq. 39 il öncə monarxiya devrilib və ölkə islam dövləti elan edilib.

İran liderləri vətəndaşları hakimiyyətin təşkil etdiyi mitinqlərdə fəal iştiraka çağırırlar.

"Mitinqlərdə iştirak adamların hökumətlə əlaqələrinin nə qədər dərin və mehriban olduğunu, əvvəlkitək inqilab prinsiplərinə uyğun olduğunu göstərəcək, - İran prezidenti Ruhani çərşənbə günü hökumətin iclasında bildirib.

Ayətolla Hameneyi deyib ki, insanların 11 fevral mitinqlərində iştirakı möhtəşəm olacaq, çünki millət hesab edir ki, düşmən pusqudadır. O, Amerika hakimiyyətinin antiiran bəyanatlarına işarə edib, Mehr agentliyi məlumat verib.

Şənbə günü Bakıda İran səfirliyində islam inqilabının ildönümü münasibətilə qəbul keçirilib.

İran səfiri Cavad Cahangirzadə bildirib ki, İran İslam Respublikası regional sabitlik faktoru kimi çıxış edir, terrorizm və radikalizmin qarşısının alınması üçün ciddi və effektiv addımlar atır.

Səfir qeyd edib ki, İranla Azərbaycan arasında ardıcıl inkişaf edən dost və qardaşlıq münasibətləri iki dövlət başçısı tərəfindən dəstəklənir.

Əvvəlki illərdən fərqli olaraq bu il İran tərəfi Azərbaycandan olan qonaqların Tehranda bayram tədbirlərində iştirakına maraq göstərib.

İran səfiri bir sıra siyasi, ictimai xadim və jurnalistin, o cümlədən Azərbaycan Demokrat Partiyasının (ADP) sədri Sərdar Cəlaloğlu, Vətəndaş və İnkişaf Partiyasının (VİP) sədri Əli Əliyevin bu ölkəyə səfərini təşkil edib.

VİP mətbuat xidmətinin məlumatına görə, bir neçə gün davam edəcək səfər zamanı İran prezidenti Həsən Ruhani, İİR parlamentinin azərbaycanlı deputatları və siyasi partiyaların təmsilçiləri ilə görüşlər nəzərdə tutulub.0-