Diplom üçün xaricə getmək və orada qalmaq

Bakı/10.02.18/Turan: Fevralın 10-da Bakıda JW Marriott Absheron otelində beynəlxalq təhsil sərgisi açılıb. Sərginin təşkilatçısı "AzeriStudent" şirkətidir.

Tədbirdə Avropa, ABŞ, Kanada, hətta Avstraliyanın 50-yə yaxın ali təhsil müəssisəsi iştirak edib. Onların arasında Coventry University, University of Leicester (Böyük Britaniya), Epoka (Albaniya), UNI Mannheim, Münhen Texniki Universiteti (Almaniya), University of Vermont, Oglethorpe University (ABŞ), Royal Roads University, St Giles Junior summer Vancouver UBC (Kanada) var.

Sərginin qrafiki kadr hazırlığı üzrə yeni standartlara dair blits-təqdimatları, əmək bazarında konyunktura, xaricdə stajkeçmə, təqaüd proqramları, gənclərin karyera imkanlarını təqdim edir.

200-dən çox bakalavriat və magistratura proqramı, PhD, MBA ali məktəbləri, eləcə də məktəb-pansionlar, dil kursları haqqında informasiya-sorğu materialları müasir təhsil xidmətləri bazarına yönəlməyə, bu və ya digər universitet proqramının xeyrinə seçim etməyə imkan yaradır.

Bundan əlavə, ali məktəblərin stendlərində təkcə təhsil şəraiti və qiymət haqqında deyil, həm də tələbə kampusu - kitabxana, yataqxana, idman və əyləncə mərkəzləri haqqında məlumatlar yerləşdirilib.

"AzeriStudent" şirkətinin rəhbəri Rasim Allahverdiyev Turan-a bildirib ki, son illər xaricdə təhsil almaq gənclərimiz arasında nüfuz sayılır.

Minlərlə azərbaycanlı keyfiyyətli təhsil almaq, ən yaxşı peşə perspektivlərinə malik olmaq üçün xarici ali məktəblərə daxil olmağa can atır. Hazırda iqtisadi, texniki, tibb ixtisaslarına tələbat çoxdur, çünki bu sahələr dinamik inkişaf edir. Odur ki, gənclər bu istiqamətlərlə daha çox maraqlanırlar.

"Xaricdə ali təhsil almaq təkcə maraqlı təcrübə deyil, həm də özünün və övladlarının gələcəyinə investisiya qoymaqdır. Təhsil almaq üçün uzun müddətə xaricə getmək ciddi addımdır. Bu, hərtərəfli hazırlıq və çoxsaylı suallara cavab axtarışını tələb edir", - R.Allahverdiyev vurğulayıb.

Araşdırmalar göstərir ki, son illər yerli əmək bazarında yeni trend nəzərə çarpır - xarici ali məktəblərin diplomlarını alan yüksək ixtisaslı mütəxəssislərə tələbat artır.

İşəgötürənlər bu cür mütəxəssislərə üstünlük verirlər. Bu faktor tələbələrin təkcə ixtisas seçiminə yox, həm də tədris müəssisəsinin yeri üzrə seçiminə göstərir. Qeyd edək ki, Azərbaycanda iqtisadi böhran fonunda xaricdə təhsilə maraq stabil səviyyədədir. Azərbaycan gənclərinin təhsili üzrə Dövlət Proqramı başa çatıb. Belə olan vəziyyətdə sərğilər köməkçi və məsləhətçi rolunu oynayırlar.

Həqiqətən otelin iki böyük zalında, ekspozisiyanın qurulduğu yerdə sərgiyə gələnlərin sayı çox idi. Paytaxtın ali məktəblərinin tələbələri, orta məktəblərin yuxarı sinif şagirdləri çap informasiya materialları ilə tanış olublar, həmçinin dünya universitetlərinin nümayəndələri ilə ünsiyyətdə olublar, təhsil proqramının çətinlikləri ilə yanaşı işə düzəlmək və yaşamaq məqsədilə həmin ölkədə qalmaq imkanları ilə maraqlanıblar.

Məlum olub ki, belə plan tamamilə realdır. Londondan Bakıya gələn Anar Seyfəddin buna canlı nümunə olub.

O, Albaniyada Epoka Universitetini bitirdikdən sonra orada qalıb. Hazırda həmin li məktəbdə marketinq üzrə dərs deyir, Tiranada özünün kiçik biznesi var, Böyük Brianiyadan olan həmkarları ilə işgüzar münasibətlər qurub.

A.Seyfəddinin sözlərinə görə, azərbaycanlı tələbələr təhsil almaq üçün ən çox Fransa, Böyük Britaniya, Türkiyə, Almaniya, Çexiya, Kanada və ABŞ-ı seçirlər. Onlar təhsil haqqı ilə yanaşı, Avropada işədüzəlmə perspektivlərinə də diqqət yetirirlər. Deyək ki, Albaniya və Macarıstanda ali təhsilin üstünlüyü Avropanın digər inkişaf etmiş ölkələri ilə müqayisədə qiymətin aşağı olmasıdır. Burada təhsil proqramları İsveç, Hollandiya, Avstriyada olduğundan xeyli ucuzdur (ildə 5-7 min dollar). Mənzil icarəsi, nəqliyyat və yemək nisbətən ucuzdur, tələbə güzəştləri də var. Həmçinin maddi baxımdan Çexiya, Polşa, Bolqarıstan, Latviya və Litva da tələbələr üçün əlverişlidir.

Ancaq burada bir məqam var: Böyük Britaniyada universiteti bitirdikdən sonra azərbaycanlı məzunların demək olar ki, hamısı (həmçinin digər MDB ölkələrindən -müəllif) Vətənə qayıdır. Çünki Britaniya qanunları yerli işəgötürənlərin miqrantlara iş verməsini qadağan edir, yəni müəyyən məhdudiyyətlər var. Almaniya və ABŞ-da belə sərt qaydalar yoxdur. Odur ki, A.Seyfəddin qeyd edir ki, gənc azərbaycanlılar çox zaman müəyyən məqsədlərlə bu ölkələri seçirlər.

Beynəlxalq təhsil sərgisinə 300-dən çox tələbə və Bakı məktəblərinin şagirdləri gəlib.