“AZİREX-2024” — İran-Azərbaycan hərbi təlimləri (yenilənib)

Azərbaycan Respublikasının Müdafiə Nazirliyi ilə İran İslam Respublikası Silahlı Qüvvələrinin Baş Qərargahı arasında imzalanmış hərbi və hərbi-texniki əməkdaşlığa dair birgə komissiyanın iclasının protokoluna əsasən, Azərbaycan və İran İslam Respublikası Ordusunun Hərbi Dəniz Qüvvələrinin bir qrup şəxsi heyəti və gəmisinin iştirakı ilə “AZIREX-2024” birgə taktiki təlimi keçiriləcək. 

Noyabrın 2-də təlimdə iştirak etmək məqsədilə qonşu ölkəyə səfər etmiş Azərbaycan Ordusunun şəxsi heyət və döyüş gəmiləri Ənzəli dəniz limanına gəliblər.

Xəzər dənizinin İran İslam Respublikasına mənsub hissəsində keçiriləcək "Dənizdə axtarış-xilasetmə" təliminə Azərbaycan Hərbi Dəniz Qüvvələrinin 2 vahid gəmisi və 100-dən çox şəxsi heyəti qatılacaq.   Bu barədə noyabrın 3-ü axşam saatlarında Azərbaycan Müdafiə Nazirliyinin məlumatında deyilir.
 

* * *

2024-11-03 14:15

İran və Azərbaycan Xəzər dənizində birgə axtarış-xilasetmə təlimləri keçirəcək

Noyabrın 4-də İran və Azərbaycan Xəzər dənizində birgə axtarış-xilasetmə təlimi keçirəcək, İran Müdafiə Nazirliyi bildirib.

“AZİREX2024” adlı birgə axtarış-xilasetmə təlimi sülh və dostluq naminə əməkdaşlıq şüarı altında keçiriləcək.

Bəyanatda deyilir ki, təlimin məqsədi regionda kollektiv təhlükəsizliyi gücləndirmək və sahilyanı ölkələr arasında çoxtərəfli əməkdaşlığı genişləndirmək, eləcə də bu ölkələrin dəniz təhlükəsizliyini dəstəkləməkdə xoşməramlılığını və imkanlarını nümayiş etdirməkdir.

İran tərəfi təlimdə iştirak edən qüvvə və vasitələrin sayı, eləcə də təlim çərçivəsində görüləcək konkret tədbirlər barədə məlumat vermir.

Rəsmi Bakı belə təlimlərin keçirilməsi ilə bağlı hələlik məlumat verməyib.