İran yenə Naxçıvana nəqliyyat dəhlizi məsələsinə toxunub

Bakı/05.07.23/Turan: Azərbaycan səfirliyinə hücum edən şəxsə qarşı cinayət işi üzrə istintaq başa çatıb. Bu ağır cinayəti törədən şəxs ən ciddi cəzanı alacaq. Bu barədə bu gün İranın XİN başçısı Hüseyn Əmir Abdullahiyan Bakıda Azərbaycan jurnalistləri ilə söhbətində bildirib.

O qeyd edib ki, bu məsələ onun Azərbaycan prezidenti İlham Əliyevlə bugünki görüşündə də müzakirə olunub.

Nazir həmçinin qeyd edib ki, "diplomatik korpusun təhlükəsizliyinin təmin edilməsi ilə bağlı hər hansı şəxsin və ya qurumun nöqsanları varsa və bu sübuta yetirilsə, bu məsələdə təqsiri olanlar da cəza çəkəcək".

İran naziri Azərbaycan və İran arasında yüksək səviyyəli əlaqələrin bərpa olunacağına inanır.

O, həmçinin əmindir ki, Cənubi Qafqazda bütün məsələlər dinc danışıqlar yolu ilə həll olunacaq.

Abdullahiyan bildirib ki, Azərbaycan prezidenti İlham Əliyevlə görüşdə iki ölkə arasında dəmir yolu əlaqəsinin tezliklə açılması haqqında razılıq əldə olunub.

Onun sözlərinə görə, İran prezidentinin "Araz dəhlizinin" açılması haqqında sərəncamı var.

"Bu, xüsusən kommunikasiya sahəsində İran-Azərbaycan əlaqələrinin inkişafına ciddi təkan verəcək", deyə İİR XİN başçısı qeyd edib.

Onun fikrincə, bu dəhliz Azərbaycanın əsas hissəsinin Naxçıvan Muxtar Respublikası ilə birləşməsində mühüm rol oynayacaq.

Qeyd edək ki, söhbət Azərbaycanın Şərqi Zəngəzur iqtisadi zonasından NMR-ə Naxçıvandan keçən avtomobil və dəmir yolunun tikintisindən gedir. Bu layihə faktiki olaraq Ermənistandan keçən Zəngəzur dəhlizinə alternativ və ya paralel variantdır.

NMR-ə İrandan keçən dəhliz 2021-ci ildə fəal şəkildə müzakirə olunurdu. Hətta Zəngilan rayonunda Araz çayı üzərindən avtomobil körpüsü tikintisinin bünövrəsi də qoyulub. Amma 2022-ci ilin ortalarında İranın Azərbaycana qarşı düşmənçilik addımları, bu bölgədə hərbi təlimlər keçirməsi, sonradan isə Tehranda Azərbaycan səfirliyinə qarşı terror aktı törədilməsi ilə əlaqədar bu istiqamətdə işlər dayandırılıb. 16В06