İranda həbs olunmuş Xalidə Xalid ilə bağlı vəziyyət aydın deyil

Təbrizdə həbs edilən AMEA Ədəbiyyat İnstitutunun elmi işçisi, yazar Xalidə Xalid    casusluq ittihamında  günahlandırılır. Bu barədə İranın dövlət televiziyasının rəsmi saytı (İRİB) yazır. 

İRİB Təbrizə göndərilən Xalidə Xalidin irqçilik və casusluq istiqamətindəki təhrikedici fəaliyyətinə görə həbs edildiyini bildirərək bunu siyasi oyun kimi qiymətləndirib.

Xalidə Xalid və Şamxal Hüseynov aprelin 30-da gecə saatlarında azərbaycanlı fəal Məhəmməd (Oxtay) Rəşidinin ata evində İran İnformasiya, Təhlükəsizlik və Kəşfiyyat Nazirliyinin (ETTELAAT) əməkdaşları tərəfindən həbs ediliblər.  Bundan başqa 4 yerli azərbaycanlı fəalın həbsə alındığı bildirilir. Həbs edilənlər azərbaycanlı fəallar – yazıçı Aşıq İsaq Qaraxanlı, Təbriz Azad Universitetinin tələbəsi  Əmir Hadiyan və yazıçı Fərhadi Soyadlıdır.

Onlar O.Rəşidinin anasının doğum günü və İranda Analar Günü münasibətilə onun ata evinə toplaşıblar. 

Hazırda onların harada saxlanıldıqları məlum deyil.

Azərbaycanın Təbrizdəki Baş Konsulluğu İran tərəfinə Azərbaycan vətəndaşların saxlanılması ilə bağlı nota təqdim edib. Hələlik İran tərəfindən notaya rəsmi cavab verilməyib.

İranın Bakıdakı səfirliyindən şərh verməyərək bildiriblər ki, İran tərəfinin mövqeyi İSNA agentliyinin 4 may tarixli məlumatında əksini tapıb. Belə ki, İran XİN-in nümayəndəsi  bildirib ki, Azərbaycan vətəndaşları “qanunsuz əlaqələr qurmaqda ittiham olunurlar”.

Azərbaycan XİN mətbuat xidmətindən Turan-a bildirilib ki, bu məsələ Azərbaycanın  nəzarətindədir. İran tərəfinə sorğular göndərilib, səfirliklər təlimatlandırılıb. Xalidə Xalidin casusluqda ittiham olunmasına gəlincə, bu məlumat rəsmi xarakter daşımır.16B-