İrəvan etiraf edib ki, Azərbaycan nəqliyyatı Naxçıvana sərbəst gedə biləcək

Bakı/23.08.22/Turan: Ermənistanın Milli Təhlükəsizlik Xidməti (MTX) bazar ertəsi avtomobillərin Azərbaycandan Naxçıvana mümkün tranziti ilə bağlı açıqlama verib.

MTX  belə tranzit olacağı təqdirdə Ermənistanda yerli və beynəlxalq əhəmiyyətli yolların bağlanacağı ilə bağlı yayılan şayiələri təkzib edir.

Yerasx (Naxçıvanla sərhəd), Sotk (Kəlbəcərlə sərhəd) və Qaraxuncda (Qubadlı ilə sərhəd) açılacaq yeni keçid məntəqələri “Azərbaycan Respublikasından avtomobil nəqliyyatının Naxçıvan Muxtar Respublikasına tranzit keçməsinə şərait yaradacaq”, - xəbərdə deyilir.

“Hazırda Ermənistan əhalisinin və əcnəbilərin hərəkətinə heç bir  məhdudiyyətlər nəzərdə tutulmayan tranzit üçün mümkün marşrutlar və prosedurlar hazırlanır”,-  MTX qeyd edir.

Rəsmi Bakı bu xəbəri hələ şərh etməyib.

Qeyd edək ki, əvvəllər Azərbaycanın qərb hissəsindən Ermənistan ərazisindən (Meğri)  keçməklə Naxçıvana gedən dəmir yoluna paralel bir avtomobil yolundan danışılırdı. -02B-