İslam dünyası barış və həmrəyliyə çağırır

Cümə axşamı İstanbulda İslam Əməkdaşlıq Təşkilatının (İƏT) 13-cü sammiti başlayıb. “Ədalət və sülh naminə birlik və həmrəylik” devizi ilə keçirilən ikigünlük sammitdə 56 dövlətin nümayəndələri iştirak edir, o cümlədən 33 dövlət prezident və baş nazir səviyyəsində təmsil olunub.

Sammitdən öncə Türkiyə və Qazaxıstan prezidentlərinin birgə bəyannaməsi olub. Ərdoğan və Nazarbayev İƏT dövlətlərini müsəlmanlar üçün yeni siyasi platforma kimi islam birliyinə çağırıblar.

Türkiyə prezidentinin mətbuat katibi İbrahim Kalın bildirib ki, sammitin yekunlarına görə, 200 paraqrafdan ibarət bəyannamə qəbul edilib. Fələstin probleminə xüsusi diqqət yetiriləcək. Gözlənilir ki, İƏT ölkələri İsraili Qəzza bölgəsində blokadanı götürməyə çağıracaqlar. Sammit iştirakçıları terrorizmə qarşı mübarizəni və iqtisadi əməkdaşlığı müzakirə ediblər.

Ötən gün axşam “Savarona” gəmisinin göyərtəsində Türkiyə prezidenti Rəcəb Tayyib Ərdoğanın adından sammitdə iştirak edən dövlət və hökumət başçılarının şərəfinə şam yeməyi verilib.

Ərdoğan ikitərəfli danışıqlardan sonra şam yeməyinə Azərbaycan prezidenti ilə birlikdə gəlib.

İ.Əliyevin mətbuat xidmətinin məlumatına görə, görüşdə regionda son hadisələr və Qarabağ münaqişəsi ətrafında vəziyyət müzakirə edilib. İkitərəfli və digər məsələlərə dair fikir mübadiləsi aparılıb.

Sammit çərçivəsində nazirlərin görüşündə Trükiyə XİN rəhbəri Mövlut Çavuşoğlu bu təşkilat çərçivəsində Dağlıq Qarabağ üzrə kontant qrupunun yaradılmasının vacibliyini bildirib.

Ermənistan təşəbbüsün əleyhinə çıxıb. Erməni tərəfi hesab edir ki, Qarabağ nizamlanması ilə ATƏT-in Minsk Qrupunun həmsədləri  məşğul olur və   başqa təşkilatlar onların səylərini dəstəkləyə bilər. -0—