İsmayıllı hadisələri üzrə hazırlıq iclası mətbuatın və hüquq müdafiəçilərinin iştirakı olmadan keçib

Şəki Ağır Cinayətlər üzrə Məhkəmədə Rəşid Hüseynovun sədrliyi ilə 23-24 yanvar İsmayıllı hadisələri ilə bağlı hazırlıq iclası başlayıb.

Proses açıq olsa da jurnalistlər, hüquq müdafiəçiləri, müxalifət fəalları, hətta müttəhimlərin bir çox qohumları zala buraxılmayıb. Bu, zalda yerin məhdud sayda olması ilə izah edilib.

Lakin bundan öncə vəkillər prosesə marağın böyük olduğunu nəzərə alaraq məhkəmə iclasının böyük yerdə keçirilməsi barədə  vəsatət qaldırıblar.

Bakıdan və İsmayıllıdan gedən 200-ə yaxın adam beş saata yaxın küçədə dayanmalı olub.

Məhkəmə zalından gələn hay-küy, qışqırıq səslərindən iclasın emosional-gərgin şəraitdə keçdiyi bəlli olub. 

İclasdan sonra REAL hərəkatının lideri İlqar Məmmədovun vəkili Xalid Bağırov prosesi “biabırçı şou” adlandırıb.

Onun sözlərinə görə, zalda o qədər sıxlıq olub ki, müttəhimlər hətta barmaqlığın arxasından hakimi güclə görüblər.

Bəzi müttəhimlərin halı pisləşib. 

İlqar Məmmədov  və Müsavat Partiyası sədrinin müavini  Tofiq Yaqublu prosesin siyasi xarakterli olduğunu bildirərək İlham Əliyevi digər müttəhimləri azad etməyə çağırıblar.

Vəkillər prosesin videoçəkilişinin aparılması ilə bağlı vəsatətə qaldırıblar, lakin məhkəmə bu təklifi qəbul etməyib.

Sonra İ.Məmmədovun və T.Yaqublunun vəkilləri cinayət işinin dayandırılması və həbs qətimkan tədbirinin dəyişdirilməsi barədə vəsatət qaldırıblar.  

X.Bağırov deyib ki, əgər sonuncu vəsatət təmin olunmasa vəkillər prosesdə iştirakdan imtina edəcəklər.

Vəkillər diqqəti ona yönəldiblər ki, İ.Məmmədovun həbs müddəti bitib və onun həbsdə saxlanması qanunsuzdur.

Hazırlıq iclası noyabrın 5-də saat 11:00-da davam edəcək

Yanvarın 23-də İsmayıllıda “Çıraq” hotelinin inzibatçısı Emil Şəmdinovun və onun tanışı Elməddin Məmmədovun sərxoş vəziyyətdə özgənin əmlakının zədələnməsi ilə müşayiət olunan qərəzli xuliqanlıq hərəkətləri etmələri və bununla əlaqədar hadisə yerinə toplaşmış bir qrup şəxs tərəfindən “Çıraq” hotelinin və müxtəlif markalı avtomobillərin yandırılması ilə nəticələnən kütləvi münaqişə, daha sonra kütləvi etirazlar baş verib.    

   Etirazlar yanvarın 24-də yatırılıb. 18 nəfər həbs edilib. Həbs olunanların arasında etirazlar yatırıldıqdan sonra İsmayıllıya getmiş müxalif REAL hərəkatının lideri İlqar Məmmədov və Müsavat Partiyası başqanının müavini Tofiq Yaqublu da var. 

  Tofiq Yaqublu, İlqar Məmmədov, həmçinin İsmayıllı rayon sakinləri Cinayət Məcəlləsinin 233 (ictimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə) və 315.2-ci (hakimiyyət nümayəndəsinə qarşı müqavimət göstərmə və ya zor tətbiq etmə) maddələri ilə cinayət işi qaldırılıb və barələrində həbs qətiimkan tədbiri seçilib. -16D-