İsmayıllı hadisələri üzrə prosesdə (YENİLƏNİB)

Ağır Cinayətlərə dair İşlər üzrə Şəki Məhkəməsində İsmayıllıda 2013-cü il yanvar iğtişaşları üzrə işlə bağlı dinləmələr davam edib.

Günün ikinci yarısında vəkillər vəsatətlərlə çıxış ediblər. Belə ki, Fuad Ağayev həbs qətimkan tədbirinin başqa qətimkan tədbiri ilə dəyişdirilməsi, habelə Məmmədova qarşı yalançı şahidlik edənlərin ifadələrinin dəlillər siyahısından çıxarılması haqqında vəsatət qaldırıb.

O, həmçinin Məmmədovun hüquqazidd əməl törətmədiyini təsdiq edə biləcək əlavə şahidlərin dindirilməsi haqqında vəsatət qaldırıb.

Lakin hakim bu vəsatətlərə baxmayıb, bu barədə Turan-ın müxbirinə vəkil bildirib. Növbəti iclas dekabrın 10-na təyin edilib.

Məmmədovun digər vəkili Rəşid Hacılı stenoqrafçının çıxışları tam yazmağı çatdırmadığı üçün prosesin video və audioçəkilişinin aparılması haqqında vəsatət qaldırıb. Amma bu vəsatətə də baxılmayıb. -06C-

2013 Noyabr 29 (Cümə) 14:12:48

Bu gün Şəki Ağır Cinayətlər Məhkəməsində 2013-cü ilin yanvarında İsmayıllıda baş vermiş iğtişaşlar üzrə cinayət işinə baxılması davam edib. 

Hakimlər zala daxil olarkən müttəhimlər – REAL hərəkatının rəhbəri İlqar Məmmədov və Müsavat Partiyası sədrinin müavini Tofiq Yaqublu nümayişkaranə şəkildə ayağa qalxmayıblar. İcraçılar dərhal “tədbir  görülməsi üçün” bunu protokollaşdırıblar.

Nahardan sonra vəkillərin vəsatətlər irəli sürəcəyi gözlənilir.

Prosesdə Milli Şuranın liderlərindən biri Cəmil Həsənli, ABŞ səfirliyinin nümayəndələri iştirak ediblər. 

C.Həsənli İsmayıllı hadisələri iştirakçıları üzərində prosesi “siyasi məzhəkə” adlandırıb.   

Məhkəmə binası polisin mühafizəsinə götürülüb. Binaya gedən yol 50 metrdən bağlanıb. Odur ki, Bakıdan gedən yüzə yaxın adam küçədə qalmalı olub.—06C-