İsmayıllıda yeni toqquşmalar (yenilənib)

Bu gün Bakı vaxtı ilə saat 20 radələrində İsmayıllıda yerli əhali ilə polis qüvvələri arasında yeni insident yaşanır. Bir neçə saat öncədən etirazçıların icra hakimiyyətinə doğru yürüşü başlayıb.

Saat 16.30-a İsmayıllıda vəziyyət gərgin olaraq qalır.

Daxili Qoşunlar və çevik polis alayı icra hakimiyyətinin binasına gedən bütün küçələri etirazçılardan təmizləyiblər. Turan-ın müxbirinin hadisə yerindən verdiyi məlumata görə, sonuncu dəfə etirazçıların dağıdılması zamanı (saat 15 radələrində) daha 10 nəfər döyülüb və saxlanılıb. Üzərinə daş atılan daha bir neçə polis xəsarət alıb.

Mitinq iştirakçılarının əksəriyyəti (min nəfərə yaxın) dağıdılıb. Polis bütün ictimai obyektlərin (mağaza, kafe, çayxana və s.) bağlanmasını tələb edib. İnsanlara mərkəzi küçələrə çıxmağı qadağan edirlər.

Bu arada, qonşu rayonlarda – Ağsu, Qəbələ və Göyçayda vəziyyətin gərginləşdiyi haqda məlumatlar daxil olur. Qeyr-rəsmi məlumatlara görə, bir qrup insan bu rayonların icra hakimiyyəti binalarının qarşısında toplaşaraq, hakimiyyətin hərəkətlərindən narazılıqlarını bildirirlər.

Lakin rəsmi orqanlar bu məlumatları təsdiq etmir.

Eyni zamanda, DİN və Baş Prokurorluq İsmayıllıda bu gün baş verənləri şərh etmir. Belə ki, Turan agentliyi kütləvi iğtişaş faktı üzrə cinayət işi açılıb-açılmadığı, neçə nəfərin saxlandığı, neçə nəfərin xəsarət aldığı, rayona Daxili Qoşunların nə qədər qüvvəsinin yeridildiyi, yolların niyə bağlandığı, fövqəladə vəziyyət tədbiq edilib-edilmədiyi haqqında suallara cavab ala bilməyib.

Hər iki güc qurumunun mətbuat xidmətləri bütün bu və digər suallara cavab verə bilmir və ya cavab vermək istəmir. -02В- 

İsmayıllıda atışma başlayıb

Saat 14:45-də Daxili Qoşunlar mitinq iştirakçılarına atəş açıblar. Yerli sakinlərin sözlərinə görə, qoşunlar rezin güllələrdən istifadə edir. 

Buna cavab olaraq etirazçılar içərisində alışqan maddələr olan şüşələrdən və daşlardan istifadə edir.

Hər iki tərəfdən xəsarət alanlar var.

Hazırda qarşıdurmalar icra hakimiyyətinin binasından bir neçə km məsafədə olan rayon bazarına keçib.

Daxili qoşunlar jurnalistlərin fəaliyyətini, habelə şəhərə gələnlərin girişini məhdudlaşdırır. -0-

Daxili qoşunlar İsmayıllının girişini əhatəyə alıblar

Günorta daxili qoşunlar İsmayıllı rayon mərkəzinə (Bakıdan 190 km. aralı) gedən yolları əhatəyə alaraq nəqliyyatı buraxmır. Həmçinin qonşu yaşayış məntəqələrinin sakinləri rayona buraxılmır. Bakıdan gələn bəzi jurnalistlərə də məhdudiyyətlər tətbiq olunub.

Turan-ın müxbirinin məlumatına görə, İnternetdən istifadə çətinləşib, yerli İnternet klublar bağlıdır. Hakimiyyət dünəndən baş verən iğtişaşlarla bağlı videoçarxların Youtube-da yerləşdirilməsinə yol verməməyə çalışır.

Eyni zamanda xüsusi xidmət sosial şəbəkələrdə İsmayıllı sakinlərinə dəstək və ya etirazlarda iştirak etmək üçün rayona getməklə bağlı çağırışlara dair yazışmaları nəzarətdə saxlayır. -0-

Polis mitinqçiləri dağıtmaq üçün xüsusi vasitələrdən istifadə edir, onlarla adam saxlanılıb

Daxili qoşunlar və xüsusi polis bölmələri mitinqçiləri dağıtmaq üçün gözyaşardıcı qaz və suvurandan istifadə edirlər. Turan-ın müxbirinin hadisə yerindən verdiyi məlumata görə, onlarla adam saxlanılıb. İcra Hakimiyyətinin binasının 2 km.-də mitinqçiləri sıxışdırmağa başlayıblar. Lakin adamlar dağılışmır. Qarşıdurma şəhər ətrafına da keçir.

Polislər meqafonla adamları dağılışmağa çağırırlar, lakin cavabında “İstefa!”, “Azadlıq!” səsləri eşidirlər.-0- 

Səhərdən İsmayıllıda iğtişaşlar yenidən başlayıb

Turan-ın müxbirinin İsmayıllı rayon mərkəzindən verdiyi məlumata görə, yanvarın 24-də saat 10:00-a yaxın rayonda vəziyyət sabit olub. Sonradan bir neçə yüz yerli sakin yenidən toplaşaraq İcra Hakimiyyətinin binasını əhatəyə alıb. Onlar icra başçısının istefasını tələb edirlər. Hüquq-mühafizə qüvvələri buna yol verməmək üçün tədbirlər görür və mitinqçiləri sıxışdırır.

Saat 10:30-da polis onlardan dağılışmağı tələb etsə də adamlar “İstefa!” şüarını səsləndirərək polisi daşa basıblar.

Hələ ki küçələrdə adam azdır və rayon mərkəzi fövqəladə vəziyyətin tətbiq olunduğu yeri xatırladır: küçələrdə DİN-in çevik polis alayı, digər qurumların xüsusi  bölmələri, mitinqçiləri dağıtmaq üçün texnika yerləşdirilib.

Yerli sakinlər bildirirlər ki, iğtişaşlara əmək və əhalinin sosial müdafiəsi naziri Füzuli Ələkbərovun oğlu ilə baş vermiş insident səbəb olub. Dünən axşamdan keçmiş “Hammer“ avtomobilində Çıraq” otelindən çıxarkən yerli taksi sürücüsünün maşınını vurub. Sürücülər arasındakı mübahisə taksi sürücüsünə köməyə gələn yerli sakinlərin iştirakı ilə davaya çevrilib. “Hammer”in döyülmüş sürücüsü xəstəxanaya aparılıb.

Lakin DİN və Baş Prokurorluğun məlumatına görə, avtoxuliqanlığı “Çıraq” otelinin sərxoş sahibi – Emil Şəmsəddinov və yerli sakin Elməddin Məmmədov törədiblər ki, onlar da saxlanılıblar. 

Sonra kortəbii nümayiş başlayıb. Müxtəlif hesablamalara görə, nümayişdə 2 mindən 4 minədək adam iştirak edib. Nümayişçilər Ələkbərovlar ailəsinə məxsus “Çıraq” otelini yandırıblar. Onlar həmçinin İcra Hakimiyyətinin başçısı, əmək və əhalinin sosial müdafiəsi nazirinin qardaşı Nazim Ələkbərovun evini yandırmaq istəyiblər. Lakin yerli ağsaqqallar bunu etməmək üçün hiddətlənmiş adamları dilə tutublar.  Ələkbərovun villasının mühafizə yeri yandırılıb.

Aksiya zamanı icra başçısının istefası tələb olunub. 

Nümayişçilər gecə saat üçə yaxın dağılışıblar. Sakinlərdən biri Turan-a bildirib ki, onlar rayonda repressiv rejim yaratmış Nazim Ələkbərovun istefasına nail olacaqlar.

Oliqarx-nazirlərin əkin sahələrini, otlaqları zəbt etməsi yerli sakinlərin qəzəbinə səbəb olur. Kəndlərdə sakinlərin hərəkətinə məhdudiyyətlər qoyulub, onlara meşələrdən istifadə etmək qadağan olunub, bəzi kəndlərdə postlar qoyulub ki, giriş-çıxış zamanı pasportlar yoxlanılır. 

İsmayıllı qonşu Qəbələ, Oğuz rayonları ilə yanaşı mənzərəli dağətəyi zonasına daxildir. Bu rayonlarda da öz hökmranlıqlarını genişləndirən və yerli sakinləri sıxışdıran məmurların aqressiv fəallığı hökm sürür. Başqa regionlarda olduğu kimi, bu zonada da sosial təbəqələşmə təhlükəli həddə çatıb. Ötən il Quba rayonunda da bu cür etiraz aksiyası baş vermişdi. Mart ayında yerli sakinlər icra başçısının istefası tələbilə onun bir sıra obyektlərini yandırıblar. Sonradan hakimiyyət nümayiş iştirakçıları arasında həbslər aparıb.

İsmayıllı sakinlərinin sosial gərginliyin yaşanması bir ay deyil. Hələ ötən ilin mayında İvanovka kəndindən bir qrup sakin Prezident Administrasiyasına gələrək icra başçısı Nazim Ələkbərovun onları sıxışdırdığını bildirib. Sakinlər onu pul yığmaqda, torpaqları zəbt etməkdə ittiham ediblər. Münaqişə ört-basdır edilib, sakinlərin müdafiə olunacağı vəd edilib və onlar da artıq şikayət etməyiblər.

Yerli sakinlərin jurnalistlərə öz adlarını deməkdən çəkinmələri də İsmayıllıda repressiv atmosferdən xəbər verir. Buna baxmayaraq, adamlar deyirlər ki, icra başçısının istefasına nail olacaqlar. “İşsızlik, yoxsulluq, vergi, qorxu atmosferi canımızı boğazımıza yığıb”, - sakinlərdən biri şikayətlənib.

Hələlik rayonda araşdırma aparılır, İsmayıllıya Bakıdan komissiya gəlib. 

Davos İqtisadi Forumunda olan prezident İlham Əliyevin hansı tədbiri görəcəyi hələlik məlum deyil. İki həftə əvvəl o, məzuniyyətini yarımçıq qoyaraq Bakıya dönmüşdü. Belə ki, yanvarın 12-də Bakıda mindən çox gənc əsgər Qubadovun orduda ölümünə etiraz olaraq nümayiş keçirmişdi.–0-