İsrail ordusu Livana daxil olub

Oktyabrın 1-nə keçən gecə İsrail ordusu Livan sərhədini keçərək, "Hizbullah"a qarşı "məhdud yerüstü əməliyyata" başlayıb.

"İsrail ordusu Cənubi Livanda "Hizbullah"ın terror obyektlərinə və infrastrukturuna qarşı əməliyyata başlayıb. Bu hədəflər sərhəd boyunca yaşayış məntəqələrində yerləşir", deyə İsrail ordusunun məlumatında bildirilir. 

Hücum edən quru qoşunlarına aviasiya və artilleriya ilə dəstək verilir. Əməliyyatın yerüstü mərhələsindən əvvəl "Hizbullah"ın arsenalının və komandirlərinin, o cümlədən bu terror təşkilatının baş katibi şeyx Həsən Nəsrullahın məhv edilməsinə yönəlmiş intensiv hazırlıq tədbirləri görülüb.

Gecə yarısına az qalmış İsrail ordusu intensiv artilleriya hazırlığına başlayıb. Bundan sonra xarici KİV-lərdə Livan ordusunun sərhəddəki mövqelərini tərk etdiyi və öz ərazilərinin dərinliklərinə çəkildiyi haqqında məlumatlar yayılıb. İsrail ordusunun mətbuat xidmətinin nümayəndəsi ərəb dilində Cənubi Livan sakinlərini təhlükəsiz yerlər tapmağa, Beyrutda Dahiya məhəlləsinin sakinlərini isə "Hizbullah"ın terror məqsədləri üçün istifadə edə biləcəyi binalardan 500 m məsafəyə çəkilməyə çağırıb.

Təxminən yarım saat sonra Dahiyaya ən az 10 zərbə endirildiyi haqqında məlumatlar daxil olub.

Sidon (Sayda) şəhəri yaxınlığında yerləşən, Livandakı fələstinli qaçqınların ən böyük düşərgəsi olan Ayn əl-Hilveyə də zərbə endirilib. Bir qədər sonra Reuters Agentliyi yazıb ki, hədəf Munir Makdah (Mounir Maqdah) - FƏTH-in yerli şöbəsinin rəhbəri idi. Hazırda onun taleyi məlum deyil.

Oktyabrın 1-nə keçən gecə Pentaqon rəhbəri Lloyd Ostin israilli həmkarı Yoav Qalantla söhbət edib. Amerika idarəsinin məlumatına görə, "tərəflər "Hizbullah" tərəfindən hücumlara imkan verməmək üçün şimal sərhədində hücum infrastrukturunun demontajına ehtiyac olması ilə razılaşıblar".

Axios nəşrinin məlumatına görə, Livandakı əməliyyat həm vaxt, həm də miqyas baxımından məhdud olacaq. Əməliyyat Livanın cənub rayonlarının işğalını nəzərdə tutmur. Ordunun sərhəddən nə dərəcədə dərinliyə getmək niyyətində olduğu haqqında məlumat yoxdur.