İstanbulda Cənubi Qafqaz üzrə konfrans keçiriləcək

Aprelin 25-26-da İstanbulda “Cənubi Qafqazda azadlıq, sülh və çiçəklənmə şərtləri” mövzusunda beynəlxalq konfrans keçiriləcək. Tədbir Almaniyanın “Azadlıq naminə” Fridrix Nauman Fondunun  himayəsilə keçiriləcək. 

Konfransda Azərbaycan, Türkiyə, Gürcüstan, Ermənistan, Rusiya, Almaniya, ABŞ, Fransa, Belçika, Norveçdən siyasətçilər və ekspertlər iştirak edəcəklər.

Azərbaycan nümayəndə heyətinə Müsavat Partiyasının lideri İsa Qəmbər, FAR Centre rəhbəri Hikmət Hacızadə, ekspert Elxan Mehdiyev və Turan Agentliyinin direktoru Mehman Əliyev daxildir.

Konfransın gündəliyinə Cənubi Qafqazda sülh və sabitlik, əməkdaşlıq perspektivləri, regional dövlətlərin siyasəti, insan amili məsələləri daxildir.

Bu ilin əvvəlində Tbilisidə keçirilmiş məsləhətləşmələr zamanı regionda vəziyyətin ekspertlər tərəfindən qiymətləndirilməsi göstərdi ki, region konfrontasiya vəziyyətinə düşür, tərəfdaşlıq, əməkdaşlıq perspektivləri yoxdur, Cənubi Qafqaz ölkələri qlobal beynəlxalq layihələrin imkanlarından tam istifadə edə bilmir.

“Fridrix Nauman Fondu Cənubi Qafqaz, Türkiyə, Rusiya və digər ölkələrdən olan tərəfdaşları ilə əməkdaşlıq şəraitində bu konfransı keçirməklə Cənubi Qafqazda hazırkı durumun ən yaxşı şəkildə anlaşılmasına öz töhfəsini vermək istəyir”, - fondun regional nümayəndəsi Yasemin Pamuk bildirib.

Konfransın təşkilatçıları region ekspertlərinin və siyasətçilərinin səylərinin birləşdirilməsi yolu ilə Cənubi Qafqazda azadlıq, sülh, sabitlik və əməkdaşlıq şərtləri haqqında təsəvvürün formalaşdırılmasına ümid edirlər. —0—