İstintaq Hafiz Hacıyevi məlumatlandırır?

Müasir Müsavat Partiyasının Siyasi Şurası bu hökumətyönlü təşkilatın sədri Hafiz Hacıyevin qarşıda duran 16 oktyabr prezident seçkilərində Azərbaycan prezidenti vəzifəsinə namizədliyinin irəli sürülməsi haqqında qərarı təsdiq edib. Bu haqda Hacıyev özü bugünki mətbuat konfransında bildirib.

Müxalifət liderlərinin ünvanına qalmaqallı ifadələri ilə məşhur olan Hacıyev bu gün də eyni mövqe nümayiş etdirib. Belə ki, Hacıyev sabiq prezident Azərbaycan Xalq Cəbhəsi Partiyasının (AXCP) lideri Əbülfəz Elçibəyin öz evində AXCP hazırki sədri Əli Kərimli tərəfindən zəhərləndiyini və “istintaqın bunu artıq sübuta yetirdiyini” bildirib.

Xatırladaq ki, ötən il Hacıyevin Elçibəyin zəhərlənməsi haqqında iddiası əsasında prokurorluq 29, 120.1-ci (insan həyatına qəsd) maddəsi ilə cinayət işi açıb.

“Məndə olan məlumata görə, artıq 110 nəfər dindirilib, Türkiyədə Əbülfəz Elçibəyi müalicə edən həkimləri ifadəsi alınıb. 10-15 gün ərzində Əli Kərimli də ifadə verməlidir”, deyə Hacıyev bildirib.

Bundan başqa, Hacıyev bir qədər irəli gedərək, əmin bir şəkildə deyib: “Hesab edin ki, Əli Kərimli artıq həbsdədir. Onun sonu gəlib”.

Xatırladaq ki, Hafiz Hacıyev Qarabağ münaqişəsi haqqında “Daş yuxular” romanına görə Əkrəm Əylislinin qulağını kəsənə mükafat təyin edən şəxsdir.

Lakin yazıçı ilə hesablaşmaq çağırışı dünyada mənfi rezonans doğurduqdan sonra Hacıyevin ipini çəkdilər və o, öz qərarını ləğv etdi. -16D06-