İstintaq qanunvericiliyi pozaraq, məlumat sızdırır - hüquqşünaslar

Bakı/24.11.23/Turan: İstintaq dövründə cinayət işinin materialları gizli qalmalıdır və onların yayılması yolverilməzdir, bu, araşdırmanın obyektivliyinə təsir edə bilər. Bu barədə Turan agentliyinə media hüquqları sahəsində ekspert Xalid Ağaliyev bəzi KİV-lərdə Abzas Media internet nəşrinin maliyyə mənbələri haqqında istintaq materiallarının yayılmasını şərh edərkən bildirib.

Belə ki, hökumətyönlü Report agentliyi öz "analitik" materialında iddia edir ki, "istintaq prosesində “Abzas Media”nın Qərb institutlarından külli-miqdarda maliyyə vəsaiti aldığı müəyyən edilib. Sıralarında USAİD, “People in Need”, “Euro Media Group” və digərləri vardır. Alınan vəsait qeydiyyatsız olaraq ölkəyə gətirilib, qeyri-leqal formada realizə edilib. Maliyyələşmədə adsız kartlardan da istifadə olunub".  https://report.az/analitika/abzas-media-sahiblerinin-diqqetinden-yayinan-korrupsiya-hallari/

İstintaq materiallarının yayılması qanunla qadağan olunub və bunda təqsiri olanlar məsuliyyət daşımalıdır. Bu halda birbaşa olaraq təfərrüatın açıqlanmasından söhbət gedir. Maraqlıdır ki, rəsmi istintaq cəmi 2-3 gün əvvəl başlayıb, amma artıq ittiham üçün əsaslar "müəyyən edib".

Ağaliyev hesab edir ki, bəlkə də bu, istintaq sirrinin yayılması deyil, Qərb strukturlarını və hakimiyyətin narazı olduğu KİV-ləri nüfuzdan salmaq və jurnalistlərin təqibinə bəraət qazandırmaq üçün kompromatdır.

Eyni zamanda, nəşrin konkret təkilatlar tərəfindən maliyyələşdirilməsi və pulun qeyri-leqal yolla ölkəyə gətirilməsi haqqında iddiası nəşrin əməkdaşlarının təqsirsizlik prezumpsiyasını pozur.

Təqsiri məhkəmə tərəfindən təsdiq edilmədən heç kim cinayət törətmiş şəxs kimi təqdim edilə bilməz, deyə Ağaliyev vurğulayıb.

Öz növbəsində, digər bir hüquqşünas, keçmiş müstəntiq Namizəd Səfərov Abzas Media jurnalistlərinin fəaliyyətində ümumiyyətlə "kriminal" görmür.

Media-qrantların alınmasında qınanılacaq heç nə yoxdur.

Digər tərəfdən, hüquq-mühafizə orqanları jurnalistləri "qaçaqmalçılıqda" ittiham edərkən Azərbaycandan milyardlarla dolların çıxarılması haqqında beynəlxalq araşdırma faktlarını görmür və onlar haqqında danışmır. Bu gün Azərbaycan məmurlarının korrupsiyasını araşdıran jurnalistləri "ifşa etməklə" məşğul olan KİV-lər də bu barədə heç nə yazmır, deyə Səfərli qeyd edib. 06В