İstintaq Təcridxanasında intihara cəhd edən fəalın səhhətində ciddi problemlər var

Həbsdə olan ictimai fəal Nicat İbrahim İstintaq Təcridxanasında özünə xəsarət yetirdikdən sonra səhhətində ciddi problemlər var. O, bu addımla əsassız cinayət təqibinə etirazını ifadə edib.

Həyat yoldaşı Pərvinin Turan-a verdiyi məlumata görə, o, dekabrın 5-də Nicatla telefonla danışıb.

"Nicat dedi ki, boğazındakı tikişləri söküblər. Möhkəm şiş var. Boğaz nahiyyəsində qan laxtası qaldığı üçün həkim yenidən qan laxtasını çəkib. Möhkəm ağrıları var. Vəziyyəti yaxşı deyil. Qulaqları möhkəm şişib, boynunu saga-sola çox döndərə bilmir. Yüksək qan təzyiqindən əziyyət çəkir", deyə həyat yoldaşı bildirib.

O xatırladıb ki, fəalın səbri, dözümü qalmayıb və o noyabrın 20-də əlindəki şüşə parçası ilə qulaqlarını, boğazını, hər yerini doğrayaraq intihara cəhd edib. 

Bundan öncə sentyabrın 9-da saxlanıldıqdan sonra o, polis bölçməsində boğazını doğrayaraq intihara cəhd edib.

Penitensiar Xidmətdən Nicat İbrahimin tələblərinin bu idarənin səlahiyyətlərinə aid olmadığını bildirirlər.

* Nicat İbrahim sentyabrın 9-da qəsdən sağlamlığa ağır zərər vurma ittihamı ilə saxlanılıb.

Sentyabrın 6-da Bakı hava limanında sərhədçilər DİN-in qadağasına istinad edərək, onu ölkədən buraxmayıblar. Onun həyat yoldaşı və iki uşağı sərhəd keçid məntəqəsini keçərək Kişinyova gedib.

Bundan sonra o, DİN-ə müraciət edərək, qanunsuz qadağanın ləğv olunmasını tələb edib və DİN-in binası qarşısında özünü yandırmaqla hədələyib.

Sentyabrın 9-da o, saxlanılıb və ona qarşı sağlamlığa zərər vurma ittihamı irəli sürülüb. Fəal ittihamları qəbul etməyib, heç kimlə münaqişəyə girmədiyini və "zərərçəkmişi" tanımadığını bildirib.

Oktyabrın 5-də o, aclıq aksiyasına başlayıb və iki həftə ərzində aclığı davam etdirib.

** İbrahim 2021-ci ildə də həbs edilmişdi və karantin rejimini pozma ittihamı ilə 15 ay azadlıqdan məhrumetmə cəzasına məhkum edilmişdi. Həbsə onun Prezident Administrasiyası qarşısında etiraz aksiyası keçirməsi səbəb olub.