İsveçin təşəbbüsü Kiyevdə müzakirə olunacaq

İyunun 4-5-də Kiyevdə “Gələcəkdə dərinləşmiş və hərtərəfli azad ticarət zonaları. Aİ Şərq Tərəfdaşlığı ölkələrində inkişafa və rifaha necə şərait yarada bilər?” mövzusunda konfrans keçiriləcək.

İştirakçılar diqqəti Aİ ilə Assosiasiya Sazişi imzalamağa hazırlaşan Gürcüstandakı, Moldovadakı və Ukraynadakı vəziyyət üzərində cəmləşdirəcəklər.

Tədbir İsveçin təşəbbüsü ilə keçiriləcək. Bununla əlaqədar olaraq, İsveçin XİN rəhbəri Karl Bildt Kiyevə səfər edəcək və konfransda iştirak edəcək.

“Şərq tərəfdaşlığı və bu sazişlər region ölkələrinə Aİ ilə daha sıx münasibətlər üçün nadir imkanlar təklif edir. Onlar Ukrayna kimi mühüm bazar üçün investisiyalar və Aİ ilə ticarət üçün xeyli yaxşı şəraiti təmin edir. Baltika və Mərkəzi Avropa ölkələri belə inteqrasiyaya müsbət nümunə oldu”, deyə Bildt dünən konfransda bildirib.

Konfransda Bildtdən başqa bir sıra məşhur xadimlər, o cümlədən Ukraynanın iqtisadi inkişaf naziri Pavlo Şeremeta iştirak edəcək.

Konfrans Aİ-nin və bölgənin aparıcı siyasətçilərini, tədqiqatçılarını, vətəndaş fəallarını və işgüzar dairələrinin nümayəndələrini bir araya toplayacaq.

Tədbirin əsas məqsədi Aİ-yə inteqrasiya potensialı və problemləri haqqında müzakirələr üçün şərait yaratmaqdan ibarətdir.

Konfrans Stokholm İqtisadiyyat Məktəbi nəzdində Stokholm Keçid İqtisadiyyatı İnstitutu (SİTE) və Kiyev İqtisadiyyat Məktəbi (KSE) tərəfindən İsveç və Ukrayna hökumətlərinin dəstəyi ilə təşkil edilib.

“SİTE regionda iqtisadi elmi-araşdırma institutlarının nadir şəbəkəsinin bir hissəsidir. Bu, bizə həm Stokholmda, həm də region ölkələrində bilik formalaşdırılmasına öz töhfəmizi vermək və mühüm siyasi müzakirələrdə iştirak etmək imkanı verir. İqtisadi islahatlar üzrə bir çox mühüm qərarların qəbul edilməli və həyata keçirilməli olduğu bir dövrdə bu, əlbəttə ki, çox əhəmiyyətlidir”, deyə SİTE direktoru Torbyern Bekker qeyd edib.

Konfrans aşağıdakı ünvanlarda canlı yayımlanacaq: 4 June live stream, 5 June live stream, See the programme here. -0-