İsveçrə Federasiyasının Milli Günü münasibətilə qəbul

Bakı/28.06.18/Turan: İyunun 27-də Landmark otelində İsveçrə Konfederasiyasının Milli Günü münasibətilə qəbul təşkil olunub.

Tədbirdə çıxış edən səfir Filiş Ştadler deyib ki, İsveçrənin Milli Günü avqustun 1-də qeyd olunur, amma həmin vaxt bir çox insanlar səyahətdə olur. Bu səbəbdən mərasimin keçirilməsi tarixini dəyişdirmək qərara alınıb.

Məhz 27 iyun tarixinin seçilməsinin ikinci səbəbi kimi səfir həmin gün dünya çempionatı çərçivəsində İsveçrə və Kosta-Rika yığmaları arasında futbol maçının keçirilməsini göstərib.

"Burada hər tərəfdə televiziya ekranları yerləşdirilib, ümid edirəm ki, tədbirimiz çərçivəsində sizinlə birlikdə bu maçı izləyəcəyik", deyə səfir çoxsaylı qonaqlara xitabən bildirib.

O, həmçinin toplaşanları İsveçrəyə səfər etməyə və ölkəsinin görməli yerləri və gözəl təbiəti ilə tanış olmağa çağırıb.

Azərbaycan hökumətindən tədbirdə xarici işlər nazirinin müavini Ramiz Həsənov iştirak edib, o, qısa nitqlə çıxış edib. -02B-