JF-17C (Block-III) çoxməqsədli döyüş təyyarələri Azərbaycan HHQ-nin arsenalına daxil olub

Çərşənbə günü Heydər Əliyev Beynəlxalq Aeroportunda Pakistan və Çinin birgə istehsalı olan müasir, yüngülçəkili, istənilən hava şəraitinə uyğun, gündüz və gecə rejimli çoxməqsədli JF-17C (Block-III) təyyarələri təqdim olunub. Müdafiə Nazirliyinin məlumatına görə, bu təyyarələr Azərbaycan HHQ-nin arsenalına daxil olub.

Pakistan Aviasiya Kompleksinin sədri vitse-marşal Hakim Raza dövlət başçısı İlham Əliyevə təyyarələrin taktiki-texniki xüsusiyyətləri, istismar qaydaları və digər göstəriciləri barədə məlumat verib.

JF-17C (Block-III) birmühərrikli çoxməqsədli döyüş təyyarəsidir.

Təyyarə hava döyüşlərinin aparılması və yerüstü hədəflərə hücum üçün nəzərdə tutulub.

Açıq mənbələrin məlumatına görə, təyyarənin maksimum sürəti 1910 km/s, uçuş məsafəsi 2037 km, uçuş yüksəkliyi 15 240 metrə qədərdir.

Təyyarənin silahları arasında ikilüləli top, 4 ədəd idarə olunanan "hava-hava" raketi, bir ədəd "hava-yer" raketi, idarə olunmayan raketlər, 15 ədədə qədər müxtəlif növ bomba var.

Pakistanın Air Operation Syndicate nəşrinin məlumatın görə, Azərbaycan 1,6 milyard dollar məbləğində bu təyyarələrdən alır.

Eyni mənbənin məlumatına görə, JF-17 öz xüsusiyyətlərinə görə MİQ-29 və SU-25 təyyarələrindən üstündür və S-300 RƏM sistemlərinə qarşı mübarizə apara bilir.

Müqavilə döyüş sursatlarının tədarükünü və pilotların təlim keçməsini də ehtiva edir.

Açıq mənbələrin məlumatına görə, bu təyyarələrin qiyməti 25 milyon dollardır. Sövdələşmə məbləğini nəzərə alaraq, Azərbaycanın hərbi təyyarələr parkını tamamilə yeniləyəcəyini demək olar. Yəni təxminən 60 ədəd jF-17C Block III təyyarəsi alınacaq.