Jurnalist Pərviz Həşimlinin doğmaları onun həbsini siyasi motivli hesab edirlər

“Bizim Yol” qəzetinin əməkdaşı, moderator.az saytının direktoru, Siyasi və Mülki Hüquqların Müdafiəsi Mərkəzinin sədri Pərviz Həşimlinin harada saxlanması barədə hələ də məlumat yoxdur. Jurnalistin qardaşı Zamin Həşimlinin  Turan-a verdiyi məlumata görə, hazırda vəkil Elçin Sadıqovdur. Onun sözlərinə görə, qardaşının evində divanın altından qumbara  tapılıb. Bununla razılaşmayan  Z.Həşimli bildirib ki, P.Həşimlinin  həyat yoldaşı deyib ki, MTN əməkdaşları evə giriblər. Onlardan sonra evdə silah və qumbara tapılıb.

Son zamanlar qardaşına qarşı MTN tərəfindən təhdidlər olduğunu deyən Z.Həşimli bu hadisənin onun siyasi fəaliyyətinə görə baş verdiyini bildirib. Bununla bağlı Milli Təhlükəsizlik Nazirliyi  heç bir rəsmi açıqlama vermir.

P. Həşimli C.M-in 206.3.2-ci və 228.2.1-ci maddələri ilə qaldırılmış cinayət işi üzrə şübhəli şəxs qismində cəlb edilib. Bu səbəbdən məhkəmənin qərarı ilə P.Həşimlinin evində və iş yerində axtarış aparılıb. Bu iş üzrə saxlanılanlar qanunsuz odlu silah və narkotik maddə saxlamaqda şübhəli bilinirlər.

“Bizim Yol” qəzetinin redaksiyası bəyan edir ki, P. Həşimlinin belə bir cinayət əməllərində hər hansı formada iştirakına inanmır və ümid edir ki, istintaq obyektiv və qərəzsiz aparılacaq, gerçək ortaya çıxacaq. 

Media Hüququ İnstitutunun rəhbəri Rəşid Hacılı ətraflı məlumatı olmadığından şərh verməyib və   o,P.Həşimlinin həbsi ilə bağlı rəsmi informasiyanın da olmadığını qeyd edib. Lakin o, fəal vətəndaş mövqeyinə malik jurnalistin,  hüquq-müdafiə fəaliyyəti ilə məşğul olan şəxsin həbs olunması faktı onu narahat edir. MHİ P.Həşimlinin hüquqlarının müdafiəsilə bağlı hüquqi yardım göstərmək niyyətindədir.-16D04-