Keçmiş MTN generaı 14 il yatacaq /YENİLƏNİB/

Bakı/26.07.22/Turan: Çərşənbə axşamı Bakı Ağır Cinayətlər Məhkəməsində ləğv edilmiş Milli Təhlükəsizlik Nazirliyinin (MTN) keçmiş yüksək vəzifəli məmurlarının işi üzrə prosesdə dövlət ittihamçısı son sözlə çıxış edib.

O, MTN-in istintaq idarəsinin keçmiş rəisi Mövlam Şıxəliyevi 14, digər fiqurantlar: Yasin Məmmədovu 12, Vüsal Ələkbərovu 11, Sahib Ələkbərovu 10 il müddətinə azadlıqdan məhrum etməyi təklif edib. 

Prokuror həmçinin məhkəmədən Şıxəliyevin ümumi dəyəri 9 mln. manat olan əmlakının müsadirə edilməsini istəyib.

Buraya paytaxtın Səbail və Binəqədi rayonlarında ümumi dəyəri 2 mln. 600 min manat olan mənzillər və villalar, həmçinin Ağdaş şəhərində, paytaxtın Binəqədi, Nəsimi, Səbail və Nərimanov rayonlarında onun həyat yoldaşının adına olan 3 mln. 207 min manat dəyərində mənzillər, evlər və torpaq sahəsi, bundan başqa, paytaxtın Binəqədi və Səbail rayonlarında ümumi dəyəri 3 mln. 288 min manat olan Şıxəliyevin oğlunun və qızının adına olan daşınmaz əmlak daxildir.

Prokurorun çıxışından sonra vəkillər yekun nitqə hazırlaşmaq üçün vaxt istəyiblər. Növbəti məhkəmə iclası avqustun 30-na təyin edilib.

Cinayət işinin materiallarına əsasən, 2008-2014-cü illərdə MTN-in istintaq idarəsinin keçmiş rəisi Mövlam Şıxəliyev, MTN istintaq idarəsinin keçmiş şöbə rəisi Vüsal Ələkbərov, ibtidai istintaq idarəsinin keçmiş rəis müavini Yasin Məmmədov, şöbə rəisinin keçmiş müavini Sahib Ələkbərov mütəşəkkil formada hədələmə yolu ilə istintaq altında olan şəxslərin əmlakını mənimsəyir və xüsusilə böyük ölçüdə rüşvət alırdılar.

Bu zabitlər 14 mln. 292 min manat ölçüsündə rüşvət almaqda və 5 mln. 77 min manat məbləğində əmlakı mənimsəməkdə ittiham olunurlar.

Şıxəliyevə qarşı CM-in 182.3.1, 182.3.2 (mütəşəkkil dəstə tərəfindən külli miqdarda əmlak əldə etmək məqsədilə tələb etmə), 294.3 (dəlillərin saxtalaşdırılması), 311.3.1-ci (mütəşəkkil dəstə tərəfindən rüşvət alınması) maddələr ilə ittiham irəli sürülüb. 06D