Keçmiş partokrat deputatlar istiqlalçı deputatların adından bəyanat yayıblar

Ölkənin bəzi İnternet saytları Azərbaycanın 1991-ci il Dövlət Müstəqilliyi Aktına imza atan istiqlalçı deputatlar adından bəyanat yayıblar. Bəyanatda qarşıdakı prezident seçkilərində İlham Əliyevin dəstəklənəcəyi bildirilir. 

Azərbaycan SSR Ali Sovetinin keçmiş deputatı, eks-prezident Ayaz Mütəllibovun mətbuat xidmətinin rəhbəri Rasim Ağayev belə bir toplantının keçirildiyini təsdiqləyib. Onun sözlərinə görə, keçmiş deputatlar Azərbaycanın müstəqilliyinin 20-ci ili tamam olanda Daimi Şura yaradıblar. Bu qurum ölkədə baş verən hadisələrə, deputatların həll edilməmiş problemlərinə, onların həllinə münasibət ifadə edirlər. 

Dövlət başçısı İlham Əliyevə dəstək bəyanatını da qurum bazar günü, sentyabrın 29-da qəbul edib. Amma R.Ağayev bu qurumda kimlərin iştirak etməsi, istiqlalçı deputatlardan kimlərin bu qurumda olması haqda suallara cavab verməyib. Bəyanat istiqlalçı deputatların imzaları ilə təsdiqlənməyib. 

İstiqlalçı deputat, Müsavat Partiyası Mərkəzi İcra Aparatının rəhbəri, Milli Şuranın prezidentlyiə namizədi Cəmil Həsənlinin seçki qərargahının həmsədri Arif Hacılı dövlət başçısı İlham Əliyevi dəstəkləməsi haqda informasiyanı əsassız sayıb. İstiqlalçı deputatların (İsa Qəmbər, Arlf Hacılı, Məryəm Həsənova, Tofiq Qasımov) çoxunun cəmləşdiyi Müsavat Partiyasının belə toplantı haqda məlumata malik olmadığını və belə bir toplantıda iştirak etmədiklərini deyən A.Hacılı xəbəri əsassız sayıb.

İstiqlalçı deputat Hacıbaba Əzimov belə bir toplantının keçirilməsi haqda xəbərə malik olduğunu deyib. Onun sözlərinə görə, istqlalçı deputatlar bu tədbirdə olmayıblar, bu bəyanatın həmin deputatlara aidiyyatı yoxdur. H.Əzimov bu bəyanata cavab bəyanatının hazırlanacağını bildirib.

Araşdırmalar bir faktı təsdiq edir ki, bəyanatı istilalçı deputatla yox, o zamankı “partokrat” deputatlar veriblər. Sadəcə bəyanat gurultulu alınsın deyə bunu “istiqlalçı deputatlar” ifadəsi ilə yazıblar. -05B-